जनवरीमा मात्रै १६ हजार ९७५ विदेशी पर्यटक नेपाल भित्रिए

काठमाडौं, माघ २० : सन् २०२२ को जनवरी महिनामा मात्रै कुल १६ हजार ९ सय ७५ विदेशी पर्यटक नेपाल भित्रिएका छन्।

नेपाल पर्यटन बोर्डका अनुसार, गत वर्षको तुलनामा यसपाली जनवरी महिनामा पर्यटकहरूको आगमन दोब्बर भएको छ । बोर्डको तथ्यांक अनुसार, सन् २०२१ मा विभिन्न मुलुकबाट जनवरी महिनामा मात्रै ८ हजार ८७४ जना पर्यटक नेपाल आएका थिए । 

यो संख्या अघिल्लो वर्षको सोही अवधिको तुलनामा ९१.३ प्रतिशतले बढी रहेको बोर्डले जनाएको छ । 

बोर्डको तथ्यांक अनुसार, सबैभन्दा धेरै भारतबाट तीन हजार ९१६ पर्यटक नेपाल आएका छन् । भने अमेरिकाबाट तीन हजार २५७, बेलायतबाट एक हजार ८२४, बंगलादेशबाट एक हजार २३६ र अष्ट्रेलियाबाट एक हजार २१३ पर्यटक भित्रिएका छन् । 

कोरोनाको महामारी फैलनु अघि सन् २०१९ जनवरीमा मात्रै ८१ हजार २७३ जना पर्यटक नेपाल भित्रिएका थिए।