बैतडीमा एक महिनादेखि हवाई सेवा बन्द

बैतडीको हवाई सेवा एक महिनादेखि बन्द रहेको छ। गत १६ पुसमा बैतडी–धनगढी उडान भए पनि त्यसपछि सेवा बन्द रहेको हो। साताको एक दिन शुक्रबार बैतडीबाट धनगढीसम्म समिट एयरले उडान भर्दै आएको थियो।

नियमित रुपमा उडान भइरहेका भएतापनि हाल यात्रु नपाउँदा सेवा बन्द रहेको नागरिक उड्डयन कार्यालय पाटनका वरिष्ठ अधिकृत दीपक भट्टले बताए। ‘यात्रु नहुँदा नियमित उडान गर्न सकिएको छैन, मौसम खराबीका कारण यात्रुले हवाई यात्रा गरिरहेका छैनन्।’

अठार यात्रु क्षमताको समिट एयरको जहाजका लागिसमेत यात्रु नहुँदा समस्या भएको छ। ‘दैनिक ५÷७ जनाले मात्र हवाई यात्रा खोज्ने गरेका छन्, १४÷१५ जनासम्म पुगेपछि उडान गर्न सकिन्छ।’

हाल मौसम सफा हुँदै गएकाले अब केही दिनपछि नियमित उडानको तयारी भएको जनाइएको छ।

बैतडीमा २०३२ सालमा पाटनमा विमानस्थल निर्माणको काम सुरु भएर २०३५ सालदेखि हवाई सेवा सुरु भएको थियो। पछि २०५२ सालदेखि विमानस्थल बन्द भएको थियो। त्यतिबेला पहाडी जिल्लामा सडक सञ्जाल पुगेको र यात्रु कम भएको भन्दै विमानस्थल बन्द गरिएको थियो। २०५८ सालमा सशस्त्र द्वन्द्वका क्रममा तत्कालीन विद्रोही माओवादीले विमानस्थलको टावरमा आगो लगाएर ध्वस्त बनाएको थियो।