मित्रपार्क आरोलोमा गाडीको ठक्करबाट युवकको मृत्यु

काठमाडौं, माघ १७ : काठमाडौंको मित्रपार्किस्थत ओरालो सडकमा गाडीको ठक्करबाट आइतबार राति अन्दाजी २७ वर्षीय युवकको मृत्यु भएको छ।

ती पुरुषको अहिलेसम्म सनाखत हुन नसकेको प्रहरीले जनाएको छ। उनलाई ठक्कर दिने गाडीको पनि हालसम्म नम्बर नखुलेको जनाइएको छ। सोही ठाउँ बस्ने केही व्यक्ति आपसमा झगडा गर्दा ती युवक सडकबाट तल खसी गाडीले ठक्कर दिएको भन्ने खबर प्राप्त हुनासाथ महानगरीय प्रहरी वृत्त गौशालाबाट खटिएको प्रहरी टोली त्यहाँ पुगेको थियो।

उपचारका लागि नेपाल भारत जनमैत्री अस्पताल मित्रपार्क पठाएको र उपचारकै क्रममा उनको मृत्यु भएको प्रहरीले जनाएको छ। झगडामा संलग्न दुई जनालाई नियन्त्रणमा लिइएको र फरार ठक्कर दिने गाडीको खोजी भइरहेको प्रहरीको भनाइ छ।