सहकारीले सामाजिक न्याय प्रदान गर्छ : मन्त्री भुसाल

ललितपुर, पुस २४ : ऊर्जा, जलस्रोत तथा सिँचाइमन्त्री पम्फा भुसालले मुलुकमा रहेका विभिन्न किसिमका सहकारीले समाजमा रहेका मानिसबीच समानताका साथै सामुहिक न्यायसमेत प्रदान गर्ने बताएकी छन्। 

ललितपुर महानगरपालिकाका-१२ प्रयागपोखरीमा २०५७ सालदेखि सञ्चालित रहेको श्रीगणेश बहुउद्देश्यीय सहकारी संस्था लिमिटेडको २१औं वार्षिक साधारण सभाको उद्घाटन गर्दै आज उनले सहकारीले उच्चदेखि मध्य हुँदै निम्न वर्गका मानिसलाई समेत एकैतवरले समेटेर लैजाने बताइन्। 

उनले भनिन्, ‘यसले छरिएर रहेको पुँजीको सानो अंशलाई एकत्रित गरेर उद्यमशील बनाउनाका साथै न्यून आय भएका व्यक्तिलाई सरल र सुलभ ढंगमा उनीहरुको आर्थिक जीवन तथा सामाजिक अवस्थालाई सुदृढ तुल्याउन सहयोग गर्नेछ।’ मुलुकमा चालु रहेका सहकारीको सहयोगमा व्यवसाय अघि बढाउन रकम नहुने व्यक्तिले समेत रकम लिएर नयाँ कामको थालनी गर्न पाउने उनले बताइन्।

सहकारीले मुलुकको अर्थतन्त्र बढावा गर्नाका साथै सामुहिक न्यायमा जाने पहिलो खम्बासमेत रहेको मन्त्री भुषालको भनाइ थियो। ‘सहकारीले हरेक मानिसमा बचत गर्ने बानीको विकास गर्नेछ,’ उनले भनिन्। 

महानगर प्रमुख चिरीबाबु महर्जनले महानगरपालिकामा रहेका सहकारीलाई समय सापेक्ष तथा थप गतिशिल बनाउँदै लैजाने बताए। ज्यापू समाजका प्रथम महिला उपाध्यक्ष सविना महर्जनले सहकारी भनेको सामूहिक असमानता हटाउने माध्यम रहेको धारणा राख्दै सोमा रहेका सबलका साथै दुर्बल पक्षलाई समेत अन्दाज गर्न जरुरी रहेको बताए।

सहकारीका अध्यक्ष तीर्थलाल महर्जनले सो सहकारीमा कूल एक हजार आठ सय ३० सदस्य रहेका जानकारी गराउँदै आफूहरुले ‘आधारभूत सहकारी शिक्षा’शिर्षक अन्तर्गत १८ जनालाई तालिम दिनाका साथै सहकारीमा आबद्ध रहेका परिवाकारका बालबालिका जसले दशजोड दुई उत्तीर्ण गर्दा उत्कृष्ट नतिजा हासिल गरेका छन् तीमध्येका पाँचलाई सम्मानसमेत गरी अध्ययन गर्ने बानीको विकास गराएको उल्लेख गरे।

सो कार्यक्रममा ७८ वर्ष पुगेका ज्येष्ठ नागरिकलाई जनही रु तीन हजार र यस वर्ष मृत्यु भएका ११ सदस्यका परिवारलाई किरिया अर्थात् ‘बिचा’खर्चका साथै छ सुत्केरीलाई समेत रु पाँच हजारका दरले नगद प्रदान गरिएको थियो। 

यसैगरी कार्यक्रममा स्वास्थ्य क्षेत्रमा सहयोग गर्ने व्यक्ति तथा उत्कृष्ट तीन ऋणीलाई सम्मान गर्नाका साथै ज्येष्ठ सदस्यलाई हरेक दशैं अर्थात् ‘मोहनीपर्व’मा घरघर पुगेर रु एक हजार खर्च प्रदान गर्ने गरेको बताइएको थियो।

कार्यक्रममा उपस्थित उत्कृष्ट सदस्यलाई ल्यापटप र फ्रिजका साथै लुगाधुने आधुनिक मेसिन तथा इन्डक्सन चुलोसमेत उपहार प्रदान गरिएको थियो।