खराब मौसमले अफगानिस्तानमा सहायता सामग्री वितरणमा समस्या
संयुक्त राष्ट्रसंघ, पुस २१ : संयुक्त राष्ट्रसंघ र यसका सहयोगी संस्थाहरुका साथै अरु विभिन्न संघसंस्थाहरुले अफगानिस्तानमा मानवीय सहायता सामग्री वितरणको काममा अवरोध बेहोर्नुपरेको बताइएको छ।
यहाँ केही दिनयता मौसमका कारण यस्तो अवरोध बेहोर्नुपरेको बताइएको छ। पछिल्ला केही दिनयता यहाँ वर्षा र हिमपात भएको छ।
यसका कारण यहाँ मानवीय सहयता वितरण गर्ने काममा अवरोध उन्त्पन्न भएको छ। यहाँ हप्ता दिनभन्दा लामो समयदेखि बाक्लो हिउँ परेको छ भने अधिकांश स्थानमा पानी पनि परेको छ।
यसका कारण जनजीवन निकै कष्टकर भएको छ। अफगानिस्तानको राजधानी काबुल जाने र काबुलबाट अन्य सहरका लागि उड्ने हवाई उडानहरु पनि वर्षा र हिमपातका कारण हुन सकेका छैनन्।
यो हिमपातले यहाँका स्थानीयलाई असर गरिरहेको छ भने मानवीय सहायता सामग्री वितरणका लागि काम गरिरहेका संयुक्त राष्ट्रसंघीय र अन्य संस्थाका सहायताकर्मी पनि विरामी परेका बताइएको छ।
यहाँ पछिल्लो समयमा विभिन्न देशले जाडोका लागि कपडा, खाद्यान्न तथा औषधिहरु उपलब्ध गराइरहेका छन्।
