बंगलादेशमा तीन महिनापछि सबैभन्दा बढी कोरोना संक्रमित भेटिए

ढाका, पुस १९ : कोरोना भाइरस संक्रमण बढेसँगै बंगलादेशमा थप सतर्कता अपनाउन थालिएको छ।

बंगलादेशमा संक्रमण बढे  पनि लकडाउन भने नगरिने अधिकारीहरुले जनाएका छन्। यहाँका स्वास्थ्य अधिकारीहरुले यहाँ गएको तीन महिनायताकै सबैभन्दा धेरै सङ्क्रमित देखिएका बताएका छन्।

पछिल्लो समय बंगलादेशमा बढेको डेल्टा भेरियन्टका कारण कोरोना सङ्क्रमितको संख्यामा वृद्धि भएको सञ्चारमाध्यमहरुले जनाएका छन्। बंगलादेशका सङ्क्रामक रोग विशेषज्ञहरुले यदि मानिसहरुले जनस्वस्थ्यका नियमको पालना गरेनन् भने यहाँ थप संकट बढ्न सक्ने बताएका छन्।

पछिल्लो हप्तामा यहाँ यो भाइरस निकै तीव्र गतिमा फैलिरहेको बताएका छन्। उनीहरुका अनुसार यहाँ आइतबार मात्र ५५७ जनामा यो संक्रमण बढेको बताइएको छ। यो वृद्धिदर २.९७ हो।

आइतबारको मात्र संक्रमित दर यतिधेरै देखिएको र यो गएको तीन महिनायताकै सबैभन्दा धेरै भएको पनि उनीहरुले बताएका छन्। हालसम्म बंगलादेशमा १५ लाख ८६ हजारभन्दा बढी मानिसमा कोरोना भाइरसको संक्रमण देखिएको छ।

त्यस्तै यहाँ २८ हजारभन्दा बढी मानिसको यो सङक्रमणबाट मृत्यु भएको बताइएको छ। यहाँ पछिल्लो समयमा एक घातक भाइरसका रुपमा देखिएको ओमिक्रोन भेरियन्टका बारेमा भने केही बताइएको छैन।