२२ सय गन्दा देउवाले पाए १०५१ मत

काठमाडौं, मंसिर २८ : नेपाली कांग्रेसको सभापतिमा शेरबहादुर देउवाले अग्रता बढाएका छन्। उनले पछिल्लो पटक २५६ मतले अग्रता लिएका छन्।

कांग्रेस केन्द्रीय निर्वाचन समितिका अनुसार बिहान ७ बजेसम्म २ हजार २०६ मत गणना हुँदा देउवाले १ हजार ५१ मत पाएका छन्।

त्यस्तै, सभापतिका अर्का उम्मेदवार डा. शेखर कोइरालाले ७९५ मत पाएका छन्। यसैगरी, प्रकाशमान सिंह २०४, विमलेन्द्र निधिले १७४ र कल्याण गरुङले १० मत पाएका छन्।

आज बिहान ४ बजेदेखि मतगणना शुरु भएको हो। गएराति साढे ११ बजेसम्म मतदान भएको थियो।

कांग्रेसको निर्वाचनमा ४ हजार ६७९ मत खसेका छन्। कूल ४ हजार ७४३ मतदाता रहेका थिए।