प्रचण्डको प्रश्न– गाउँमा नेता आउँदा 'चोर आए' भन्छन् भन्ने साँचो हो? कार्यकर्ताको जवाफ– हो

काठमाडौं, मंसिर २४ : नेकपा माओवादी केन्द्रका अध्यक्ष पुष्पकमल दाहाल प्रचण्डले शुक्रबार कांग्रेसको १४ औँ महाधिवेशनको उद्घाटन समारोहलाई सम्बोधन गरे । पूर्व प्रधानमन्त्री तथा पार्टी अध्यक्षको हैसियतले कांग्रेसको महाधिवेशनमा शुभकामना सन्देश दिन पुगेका प्रचण्ड बोल्दै गर्दा मञ्च र कार्यक्रमस्थलमा केही अनौठो दृश्य देखियो । 

राप्रपा नेपालका नवनिर्वाचित अध्यक्ष राजेन्द्र लिङ्देनले उद्घाटन समारोहलाई सम्बोधन गर्दै राजनीतिक दलका नेताहरुलाई गाउँमा कसैले विश्वास नगर्ने बताएका थिए । राजनीतिक दलका नेताहरु गाउँमा पुग्दा जनताले ‘चोर आयो’ भन्दै लखेट्ने सम्म भन्न भ्याए । 

त्यसपछि सम्बोधन गर्न आएका प्रचण्डले शुरुवातमै कांग्रेस महाधिवेशनमा  थुप्रै पूर्वप्रधानमन्त्रीको उपस्थिती देखेर भारतीय राजनीतिक दलका प्रतिनिधिहरु आश्चर्यमा परेको बताए । उनले सबै जना पूर्वप्रधानमन्त्रीहरु एकले अर्कालाई बनाएको भनेर आफ्नो तारिफ गरे। 

त्यसपछि प्रचण्ड राप्रपा अध्यक्ष राजेन्द्र लिङ्देनले लगाएको आरोपको खण्डन गर्न लागे । लिङ्देनलाई इंगित गर्दै प्रचण्डले महाधिवेशनको उद्घाटन समारोहमा उपस्थित भएका कार्यकर्ताहरुलाई सोधे ‘एकजना वक्ताले नेताहरु गाउँघरमा पुगे भने चोर आयो भन्छन्, भन्नुभयो तपाईँहरुले सुन्नुभयो । के यो साँचो हो त साथीहरु ?’

प्रचण्डको प्रश्नमा भीडबाट जवाफ आयो–‘हो’ । प्रचण्डले दोहोर्याएर सोधे– ‘साँच्चै हो ?’ भीडबाट फेरि जवाफ आयो– ‘हो’ । भीडबाट   त्यस्तो जवाफ आएपछि पचण्ड सम्हालिँदै खण्डनतर्फ लागे ।

‘विल्कुल होइन’ उनले भने, ‘जतिबेला लोकतन्त्रको निम्ति संघर्ष गरेका शान्तिका निम्ति लडेका राजनीतिक दल र नेताहरुलाई बदनाम गर्न खोजिन्छ त्यहाँ निरंकुशता र तानाशाही जन्माउने षड्यन्त्र हो भनेर बुझ्नुपर्छ ,’ कहीँ न कहीँ तानाशाही त्यसरु नै आउने गर्दछ ।