कांग्रेस बाग्मती प्रदेश सभापतिमा देउवा पक्षका बानियाँ बिजयी 

काठमाडौं, मंसिर १९ : नेपाली कांग्रेस वाग्मती प्रदेशको सभापतिमा संस्थापन पक्षका इन्द्र बानियाँ बिजयी भएका छन् ।

बानियाँले रामचन्द्र पौडेल पक्षबाट उम्मेद्बार बनेका जगदीश्वर नरसिंह केसीलाई १५८ मतले पछि पार्दै प्रदेश सभापतिमा विजयी भएका हुन् । आइतबार भएको दोस्रो चरणको मतदानमा खसेको कुल २ हजार मत गणना गर्दा बानियाँले १०८५ मत ल्याए।

यता, उनका प्रतिस्पर्धी केसीले ९२७ मत मात्रै पाए। बानियाँ सभापति शेरबहादुर देउवा पक्षका हुन् ।

शनिबार भएको पहिलो चरणको मतदानमा चुनावी प्रतिस्पर्धामा उत्रिएका ३ जना उम्मेदवारमध्ये कसैले पनि खसेको मतको ५१ प्रतिशत मत प्राप्त गर्न नसकेपछि दोस्रो चरणको मतदान भएको थियो।

पहिलो चरणको मतदानबाट बाहिरिएका भीमसेनदास प्रधानले संस्थापन पक्षका बानियाँलाई समर्थन गरेका थिए।