हेलिकोप्टरबाट पाथीभराको यात्रा

फुङलिङ, मंसिर १७ : माउन्टेन, कैलाश र सिम्रिक एयरले तीर्थयात्री बोकेर ताप्लेजुङको सदरमुकाम फुङ्लिङ बजारमाथि बिहान बिहान फन्को लगाउँदै आएको तीन महिना भएको छ। ती हेलिकोप्टर तीर्थयात्री बोकेर धरान, इलाम र काठमाडौंबाट प्रसिद्ध धार्मिकस्थल पाथीभरा मन्दिरमा पूजापाठ गर्न आउन थालेका हुन्।

धरानको भेडेटारबाट दसैँयता ७० उडान भएको छ। यस क्रममा ४५० भक्तजन भेडेटारबाट ताप्लेजुङको पाथीभरा मन्दिरमा पुगेर पूजापाठ गरेको धरान होलिडे ट्राभल एन्ड टुरका बजार प्रबन्धक पविन श्रेष्ठले बताए।

सदरमुकाम फुङलिङ, पॉचथर, धरान र धनकुटाको भेडेटारबाट पाथीभरा मन्दिरमा पूजापाठ गर्न आउने तीर्थयात्री रोसार आएको पाभीभरा क्षेत्र विकास समितिका कार्यकारी निर्देशक मनमणि काफ्लेले बताए। धरानबाट ३२ हजारमा यात्रु उडाउने गरेको धरान होलिडे ट्राभल एन्ड टुरका बजार प्रबन्धक श्रेष्ठले बताए।

यस वर्ष हेलिकोप्टरमा चढेर पाथीभरा जाने यात्रुको सङ्ख्या उल्लेख्य भए पनि मौसमले साथ नदिएका कारण कम उडान भएको धरान होलिडे ट्राभल एण्ड टुरले जनाएको छ। यात्रुका हिसाबले एकपटकमा पॉच जना बोक्ने हेलिकोप्टरले धरानबाट एउटा उडानमा एक लाख ६० हजार आम्दानी गर्ने गरेका छन्।

ताप्लेजुङ सदरमुकाम फुङलिङबाट १० हजार, पॉचथरको फिदिमबाट २२ र इलामको कन्यामबाट ३५ हजार भाडा लिने गरेको मेवाखोला हिल रिर्सोटका सञ्चालक सुरेश लिम्बूले बताए। काठमाडौँबाट सिधै आउने यात्रुको सङ्ख्या पनि उल्लेख्य रहेको पाथीभराका पुजारी डिल्ली आचार्यले बताए। तर  हेलिकोप्टरबाट कति सङ्ख्यामा तीर्थयात्री आए तथ्याङ्क राख्ने नगरेको क्षेत्र विकास समितिले जनाएको छ।

दशैंको नौरथा सुरु भएको असोज २१ देखि मङ्सिर १४ गतेसम्म ५५ हजारभन्दा बढीले पाथीभरा दर्शन गरेको समितिले जनाएको छ। दुई वर्षअघि चैतमा एकैदिन १७ हजारले दर्शन गरेको तथ्याङ्क समितिसँग छ।

पाथीभरामा तीर्थयात्रीले चढाएको आठ करोड बैंक मौज्दात रहेको छ। पाथीभरा क्षेत्र विकास समितिमा चालु आव २०७८ को असार मसान्तसम्म तीन करोड २७ लाख ३० हजार ७५८ बैंक मौज्दात छ।

पाथीभरा देवी मन्दिर क्षेत्र संरक्षण तथा संवर्द्धन समितिमा तीन करोड ३३ लाख ३५ हजार २०७ रहेको छ। सरकारी र समुदायस्तरबाट गठित दुवै समितिको खातामा गरी कूल रु आठ करोड भेटी सङ्कलन बैंक मौज्दात रहेको क्षेत्र विकास समितिले जनाएको छ। (रासस)