एमाले निर्वाचनमा ९९ प्रतिशत मत खस्यो 

काठमाडौं, मंसिर १४ः नेकपा एमालेको दसौं महाधिवेशनबाट पदाधिकारी चयनका लागि भएको निर्वाचनमा ९९ प्रतिशत मत खसेको छ। 

कुल २ हजार १३५ प्रतिनिधिमध्य २ हजार ११४ मत खसेको एमालेको केन्द्रीय निर्वाचन समितिले जनाएको छ। सो संख्या भनेको कुल मतदाताको ९९ प्रतिशत भन्दा बढी हो। 

मंगलबार बिहान ४ बजेदेखि शुरु भएको निर्वाचन करिब ११ बजेमात्र सकिएको थियो। एमाले अध्यक्ष केपी शर्मा ओलीले पहिलो मतदान गरेर निर्वाचनको सुरुवात गरेका थिए । 

आजको निर्वाचनबाट एमालेको १४ नयाँ पदाधिकारी चयन गर्नेछ । वरिष्ठ उपाध्यक्ष, महासचिव र उपमहासचिवमा ५ जना निर्विरोध निर्वाचित भइसकेका छन्। 

कुल १९ सदस्यीय पदाधिकारीमध्य अध्यक्ष,उपाध्यक्ष र सचिवहरु निर्वाचनको परिणामका आधारमा चयन हुनेछन् । अध्यक्षमा केपी ओली र भीम रावल प्रतिस्पर्धामा छन्। 

विद्युतीय प्रणालीबाट मतदान भएका कारण मतपरिणाम पनि चाँडै आउने बताइएको छ।