मुगुमा भीषण आगलागी, १७ घर जलेर नष्ट

मुगु, कात्तिक ३० : मुगुको सदरमुकाम गमगढीको तल्लो बजारमा गएराति भीषण आगलागी भएको छ।

आगलागीमा १७ घर र तीन घुम्ती पसल जलेर खरानी भएका छन्। आगलागी हुँदा करोडौंको क्षति भएको जिल्ला प्रहरी कार्यालयले जनाएको छ।

गएराति साढे १२ बजे आगलागी सुरु भएको थियो। बिहान साढे ४ बजे मात्रै आगो नियन्त्रणमा आएको जिल्ला प्रहरी कार्यालयले जनाएको छ।

प्रहरीका अनुसार स्थानीय बासिन्दा र सुरक्षाकर्मी समयमै परिचालन हुँदा मानवीय क्षति हुनबाट जोगिएको छ। स्थानीय ठिन्ले लामाको घरमा जलाएको दीयोबाट आगलागी सुरु भएको प्रहरीको प्रारम्भीक अनुसन्धानमा देखिएको छ।