भूमिहीनद्वारा जग्गामा स्वामित्वको माग

कञ्चनपुर, कात्तिक २६ :  कञ्चनपुरका भूमिहीनले जग्गामा स्वामित्वको माग गरेका छन्। सुकुम्बासी, भूमिहीन, दलित, आरक्ष पीडित, मुक्तकमैया महिला तथा अव्यवस्थित बसोवासीले जग्गामा स्वामित्वको माग गरेका हुन्। 

सरकारद्वारा गठित राष्ट्रिय भूमि आयोगलाई दबाब दिन उनीहरुले बहादुरसिंह महराको संयोजकत्वमा सात सदस्यीय सङ्घर्ष समितिसमेत गठन गरेका छन्। ‘हाम्रा नाममा पटकपटक आयोग र कार्यदल बन्ने र विघटन गर्ने काम हुँदै आएको छ,’ संयोजक महराले भने, ‘वर्षौंदेखि समस्या ज्यूँका त्यूँ छन्।’

सङ्घर्ष समितिले दबाबका कार्यक्रम अघि बढाउने उनी बताउँछन्। समितिले प्रमुख जिल्ला अधिकारीमार्फत सरकारलाई आयोगसम्बन्धी काम अघि बढाउन ज्ञापनपत्र बुझाउने तयारी गरेको छ। कञ्चनपुरमा ५६ हजार २४ अव्यवस्थित बसोवासी रहेको तथ्याङ्क छ।