प्रेस सेन्टरका दुई पुरस्कार

बागलुङ, कात्तिक २० : प्रेस सेन्टर नेपाल बागलुङ शाखाले दुई पत्रकारिता पुरस्कार स्थापना गरेको छ ।

गलकोट नगरपालिका–७ मल्म घर भई हाल जापानमा बस्दै आएका हर्क थापा र विकास खड्का ‘सुन्दर’ले आफ्ना दिवंगत बुवाआमाका नाममा एक–एक लाखको पुरस्कार कोष खडा गरेका हुन् ।

थापाले बुवा भक्तबहादुर र आमा जगकुमारीको स्मृतिमा ‘भक्त–जग स्मृति पत्रकारिता पुरस्कार’ र खड्काले बुवा श्यामबहादुर र आमा चन्द्रकलीको नाममा ‘श्याम–चन्द्रकली स्मृति पत्रकारिता पुरस्कार’ स्थापनाका कोष खडा गरेको शाखा अध्यक्ष थम्मन थापा ‘सन्देश’ले बताए ।

दुवै पुरस्कारको घोषणा प्रेस सेन्टरको पाँचौँ जिल्ला सम्मेलनका अवसरमा गरिएको थियो । जिल्लामा रहेर निष्पक्ष, व्यावसायिक तथा खोजमूलक पत्रकारिता गरिरहेकामध्ये उत्कृष्ट दुई जनालाई बर्सेनि पुरस्कृत गरिने थापाको भनाइ छ ।