आपसी संवादमा आदरार्थी शब्द प्रयोग गर्न सुरक्षाकर्मीलाई गृहमन्त्रीको निर्देशन

काठमाडौं, कात्तिक ५ : गृहमन्त्री बालकृष्ण खाणले नागरिकसँग संवादमा आदरार्थी शब्द प्रयोग गर्न सुरक्षाकर्मीलाई निर्देशन दिएका छन् । संगठनमा पनि सबै तहका सुरक्षाकर्मीलाई सम्मानार्थी शब्द प्रयोग गर्न उनले निर्देशन दिए ।

गृह मन्त्रालयका कर्मचारीसहित प्रहरी, सशस्त्र प्रहरी र राष्ट्रिय अनुसन्धान विभागका अधिकारीहरूलाई मन्त्री खाणले यस्तो निर्देशन दिएका हुन् ।

कार्यक्रममा गृहसचिव टेकनारायण पाण्डे, सशस्त्र प्रहरी महानिरीक्षक शैलेन्द्र खनाल, नेपाल प्रहरीका एआईजी विश्वराज पोखरेल, गृह मन्त्रालयका कर्मचारी प्रशासन महाशाखा प्रमुख सहसचिव सुनिल खनाल सहभागी थिए ।

संगठनमा बोलचालमा ‘सम्मानार्थी’ शब्द प्रयोग गर्न गृहमन्त्रीबाट निर्देशन भएको एआईजी पोखरेलले जानकारी दिए । ‘मन्त्रीज्यूबाट संगठनमा बोलचाल र निर्देशनमा ‘सम्मानार्थी’ शव्द प्रयोग गर्न निर्देशन भएको छ,’ उनले भने, ‘अब संगठनमा कसैले कसैलाई ‘तँ’ भन्न मिल्दैन । ‘सम्मानाथी’ शब्द प्रयोग गर्नुपर्छ ।’

अहिले प्रहरी, सशस्त्र प्रहरी र राअविले ‘मुस्कानसहितको सेवा’ अभियान सञ्चालन गरिरहेका छन् । अब सम्मानसहितको सेवा सञ्चालन गर्नुपर्ने निर्देशन गृहमन्त्री खाणले दिएका हुन् ।

यसैबीच, गृह मन्त्रालयले प्रहरी र सशस्त्र प्रहरीको रासन भत्तामा १५ प्रतिशत बढाउन बजेटमा गरिएको व्यवस्था कार्यान्वयन गर्ने तयारी थालेको छ ।

आर्थिक वर्ष ०७८–७९ को बजेट वक्तव्यको बुँदा नम्बर ३९२ नम्बरमा उल्लेखित १५ प्रतिशत वृद्धि भएको रासन रकम उपलब्ध गराउने तयारी गरिएको हो ।

आगामी मन्त्रिपरिषद् बैठकमा पेश गर्न गृहमन्त्री खाणले रासन भत्ता वृद्धिसम्बन्धी फाइल स्वीकृत गरेका छन् । मन्त्रिपरिषदबाट निर्णय भएपछि गत १ साउनदेखि नै प्रहरी र सशस्त्र प्रहरीका वृद्धि भएको रासन भत्ता वितरण थालिने छ ।