सिटिजन बैंकबाट नगद लुटपाटमा संलग्न थप एक पक्राउ

मोरङ, कात्तिक २ : धनपालथान गाउँपालिका–४ स्थित कर्सियाको बीपी चोकस्थित सिटिजन बैंकबाट २५ असोजमा नगद लुटपाट भएको घटनामा संलग्न रहेको अभियोगमा भारत फारबिसगञ्ज–१० का २० वर्षीय रोशन यादवलाई सोमबार प्रहरीले पक्राउ गरेको छ । घटनामा संलग्न अन्य तीनजनालाई २५ असोज साँझमै प्रहरीले पक्राउ गरेको थियो ।

उक्त बैंकबाट नगद लुटपाट गरेको घटनामा संलग्न रही फरार रहेका रोशनलाई सुनवर्षी नगरपालिका–८ सिक्टी नेपाल चोक नजिकबाट प्रहरीले पक्राउ गरेको हो । घटनामा संलग्न रही २५ असोजमा पक्राउ परेकामध्ये श्याम मुखियाको कोठाबाट १ थान पेस्तोल, १ थान म्याग्जिन र  ५ सय ग्राम अवैध लागूऔषध गाँजासमेत प्रहरीले बरामद गरेको छ ।

विराटनगर महानगरपालिका–७ स्थित सेन्ट्रल मल अगाडि रहेको कोटेक्स ट्रेडिङ सप्लायर्सका सञ्चालकलाई हतियार देखाई नगद १२ हजार रुपैयाँ लुटपाट गरेको घटनामा पनि सोही समूहका सदस्यहरूको संलग्नता रहेको अनुसन्धानबाट खुलेको छ ।