परराष्ट्रमन्त्री डा. खड्का र चिनियाँ समकक्षी वाङबीच फोन वार्ता- एकअर्का मुलुकको भ्रमण गर्ने सहमति

काठमाडौं, कात्तिक २ : परराष्ट्रमन्त्री डा. नारायण खड्का र चिनियाँ समकक्षी वाङ यीबीच मंगलबार टेलिफोन वार्ता भएको छ ।

वार्तामा नेपाल र चीनबीचका धेरै द्विपक्षीय मुद्दाबारे छलफल भएको परराष्ट्र मन्त्रालयले जनाएको छ ।

कोभिड–१९ विरुद्ध लड्न थप २० लाख डोज खोप अनुदानस्वरूप उपलब्ध गराएकामा चिनियाँ विदेशमन्त्री वाङलाई धन्यवाद ज्ञापन गरेको मन्त्रालयले जनाएको छ । उनीहरूबीच मंगलबार बिहान करिब एक घण्टा टेलिफोन संवाद भएको हो ।

संवादका क्रममा द्विपक्षीय व्यापार, विकास साझेदारी, सीमा व्यवस्थापनलगायत दुई मुलुकबीचको सम्बन्धका विविध आयामबारे वार्ता भएको थियो । नेपालमा चिनियाँ सहयोगका परियोजनाको प्रगति, आफ्नो पढाइ जारी राख्न नेपाली छात्रछात्राको चीन फिर्ति, तातोपानी र रसुवागढी नाकाबाट व्यापार बढाउन कन्टेनरको संख्या थप्ने, नियमित हवाई सेवालगायत विषयमा कुराकानी भएको मन्त्रालयले उल्लेख गरेको छ ।

वार्ताका क्रममा मन्त्री डा. खड्काले नेपालको एक चीन नीतिप्रतिको प्रतिबद्धता दोहो¥याएका थिए । चिनियाँ विदेशमन्त्री वाङले नेपाललाई थप २० डोज कोरोना खोप उपलब्ध गराउने घोषणा गरे । डा. खड्काले चिनियाँ समकक्षी वाङलाई सुविधाजनक अवस्थामा नेपाल भ्रमणको निम्तो दिए भने आफू पनि चीन भ्रमणमा आउने इच्छा व्यक्त गरे ।