दिल्लीमा विदाइ भेटमा व्यस्त राजदूत आचार्य

काठमाडौं, असोज ३१ : सरकारले फिर्ता बोलाएका भारतका लागि नेपाली राजदूत निलाम्बर आचार्य नयाँदिल्लीमा विदाइ भेटमा व्यस्त छन्।

उनले शनिबार भारतका विदेश राज्यमन्त्री भी मुरलीधरनसँग विदाइ भेट गरे । गत मंगलबार उनले भारतका विदेश सचिव हर्षबद्र्धन शृंगलासँग विदाइ भेट गरेका थिए । उनका यी विदाइ भेट स्वदेश फर्किनुअघिका शिष्टाचार भेटवार्ता हुन् ।

राज्यमन्त्री मुरलीधरनले राजदूत आचार्यसँग दुई छिमेकीबीचको बहुआयामिक सम्बन्ध र त्यसलाई अझ उचाइ दिन भएका पछिल्ला पहलहरू बारे छलफल भएको बताएका छन् । उनको कार्यकालमा नेपाल–भारत सम्बन्धलाई मजबुत बनाउन भएका प्रयासको आफूले सराहना गरेको राज्यमन्त्री मुरलीधरनले उल्लेख गरेका छन् ।

यस्तै, विदेश सचिव शृंगलाले राजदूत आचार्यको कार्यकालमा दुई मुलुकबीचको घनिष्ठ र बहुआयामिक सम्बन्धलाई अझ अगाडि बढाउन योगदान पुगेको बताएका छन् ।

सरकारले ५ असोजमा एमाले अध्यक्ष केपी ओली नेतृत्वको पूर्ववर्ती सरकारले राजनीतिक नियुक्ति दिएका १२ राजदूतलाई फिर्ता बोलाउने निर्णय गरेको थियो । आचार्य पनि उनीहरूमध्येकै हुन् ।