ग्लोबल हंगर इन्डेक्समा नेपाल ७६ औँ स्थानमा

काठमाडौं, असोज २६ : ग्लोबल हंगर इन्डेक्समा नेपाल ७६ औँ स्थानमा देखिएको छ । दक्षिण एसियाली मुलुकमध्ये बंगलादेश पनि ७६ औँ स्थानमा रहेको बीबीसीले जनाएको छ ।

एक सय १६ वटा मुलुकको सूचीमा नेपालको स्थान बंगलादेशसँग बराबरी देखिएको हो । दक्षिण एसियाली मुलुकहरू मध्ये पाकिस्तान यो सूचीमा ९२ औँ स्थानमा छ । यस क्षेत्रको सबैभन्दा ठूलो मुलुक भारत एक सय एक स्थानमा झरेको छ । यसअघि भारत यो सूचीमा ९४ औँ स्थानमा थियो ।
ग्लोबल हंगर इन्डेक्सको वेबसाइटका अनुसार यस सूचीमा टप फाइभमा चीन, ब्राजिल, कुवेतलगायत १८ वटा मुलुक छन् ।

ग्लोबल हंगर इन्डेक्सले विभिन्न मुलुकका नागरिकलाई खाद्यवस्तु कसरी र कति प्राप्त हुन्छ भन्ने आँकडा निकाल्ने गरेको छ । पछिल्लो सूचकांकअनुसार विश्वभर जारी भोकमरीविरुद्धको अभियान प्रभावी देखिँदैन ।

यो रिपोर्ट आयरल्यान्डको कन्सर्न वर्ल्डवाइड र जर्मनीको वेल्ट हंगर हिल्फले मिलेर तयार पारेका हुन् । पछिल्लो रिपोर्टले कोभिड–१९ महामारीको नकारात्मक असर समाजमा देखापर्न थालेको उल्लेख गरेको छ । सोही कारण भोकमरी बढ्ने चिन्ता व्यक्त गरिएको छ ।