मोटरसाइकल चोरी गरेको अभियोगमा ३ जना पक्राउ

पर्सा, असोज २३ : वीरगञ्ज महानगरपालिका १० स्थित प्रभु बैंक अगाडि पार्किङ गरी राखेको मोटरसाइकल चोरी गरेको अभियोगमा प्रहरीले तीन जनालाई पक्राउ गरेको छ। 

सोही महानगरपालिका १५ का विवेक कुमार यादवको ना.४८ प ९३६९ नम्बरको मोटरसाइकल चोरी गरेको अभियोगमा शुक्रबार दिउँसो प्रहरीले तीन जनालाई पक्राउ गरेको हो। 

पक्राउ पर्नेहरूमा वीरगञ्ज महानगरपालिका २ छप्कैयाका २४ वर्षीय अरमान देवान, ३० वर्षीय सदाम अन्सारी र २७ वर्षीय सहमत अन्सारी रहेका छन्।

मोटरसाइकल चोरी भएको भन्ने खबर प्राप्त हुनासाथ जिल्ला प्रहरी कार्यालय पर्सा र प्रहरी चौकी बसपार्कबाट खटिएको संयुक्त प्रहरी टोलीले खोजी गर्ने क्रममा उनीहरूलाई उक्त मोटरसाइकलसहित फेला पारी पक्राउ गरेको हो।

यस सम्बन्धमा थप अनुसन्धान भइरहेको जिल्ला प्रहरी कार्यालय पर्साले जनाएको छ।