अवैध लागूऔषधसहित तीन जना पक्राउ

काठमाडौं, असोज २१ : कैलालीको धनगढी उपमहानगरपालिकाबाट लागूऔषध सहित एक जना पक्राउ परेका छन्। ९ ग्राम २ सय ७० मिलिग्राम अवैध लागूऔषध ब्राउनसुगर जस्तो देखिने पदार्थ र ४४ ग्राम ७ सय ७० मिलिग्राम अवैध लागूऔषध चरेस जस्तो देखिने पदार्थसहित डडेलधुराकी ३४ वर्षीया आशा बिष्टलाई बुधबार दिउँसो प्रहरीले पक्राउ गरेको हो। 

उनको डेरामा लागूऔषध लुकाई राखेको भन्ने सूचनाको आधारमा वडा प्रहरी कार्यालय धनगढीबाट खटिएको प्रहरीले तलासी गर्दा उक्त लागूऔषध फेला पारी उनलाई पक्राउ गरेको हो।

त्यस्तै, रुपन्देही, बुटवल उपमहानगरपालिका ११ देवीनगरबाट १७ ग्राम अवैध लागूऔषध ब्राउनसुगर जस्तो देखिने खैरो धुलो पदार्थ, नगद २९ हजार ५ सय रुपैयाँ सहित एक जना पक्राउ परेका छन्। 

लु.२१ प ७४० नम्बरको मोटरसाइकलमा सवार ३७ वर्षीय लछुमन बिकलाई बुधबार साँझ प्रहरीले पक्राउ गरेको हो। ईलाका प्रहरी कार्यालय बुटवलबाट खटिएको प्रहरीले उनलाई उक्त पदार्थसहित फेला पारी पक्राउ गरेको हो।

नवलपरासी(पूर्व), कावासोती नगरपालिका १६ चालिस किलो जंगलस्थित सडकबाट नियन्त्रित लागूऔषध नोर्फिन ३१ एम्पुल, फेनारागन ३१ एम्पुल र डाईजेपाम ३१ एम्पुलसहित कास्की पोखरा महानगरपालिका ३२ बस्ने २५ वर्षीय डोल बहादुर थापालाई बिहीबार बिहान प्रहरीले पक्राउ गरेको छ।

लु.२ ख २८९ नम्बरको बसलाई जिल्ला प्रहरी कार्यालयबाट खटिएको प्रहरीले जाँच गर्ने क्रममा बसमा सवार उनलाई उक्त लागूऔषधसहित फेला पारी पक्राउ गरेको हो।

यस सम्बन्धमा प्रहरीले थप अनुसन्धान गरिरहेको छ।