ओलीको प्रतिवेदन : प्रचण्डले षडयन्त्रबाट तत्कालीन नेकपाको नेतृत्व हत्याउने प्रयास गरे

काठमाडौं, असोज १५ : एमाले अध्यक्ष राजनीतिक प्रतिवेदनमा तत्कालीन नेकपाका अध्यक्ष पुष्पकमल दाहाल ‘प्रचण्ड’ले पार्टी नेतृत्व हत्याउन षडयन्त्र गरेको आरोप लगाइएको छ । र, त्यसमा माधवकुमार नेपालको कुण्ठा र विभाजनकारी गतिविधि जिम्मेवार रहेको आरोप पनि लगाइएको छ ।

आफूलाई रुघाखोकीले सताएको बताउँदै एमाले अध्यक्ष केपी ओलीले राजनीतिक प्रतिवेदन पढ्ने जिम्मा पार्टी सचिव शंकर पोखरेललाई दिएका थिए । प्रतिवेदन प्रस्तुत गर्दै पोखरेलले एमालेकै कतिपय नेताले पुष्पकमल दाहालको अति महत्त्वाकांक्षालाई प्रोत्साहित गरेको दाबी गरे । र, उनीहरूले दाहालका नाजायज मागलाई प्रोत्साहित गरेको दाबी गरे ।

एमाले र माओवादी केन्द्रबीचको एकता जुन हिसाबले हुनुपर्थ्यो र जसरी अगाडि बढ्नुपर्थ्यो बढ्न नसकेको एमाले अध्यक्ष केपी ओलीको राजनीतिक प्रतिवेदनमा उल्लेख छ ।

त्यसका कारण तीन महिनाभित्र तल्लो तहसम्म एकता सम्पन्न गर्नबाट तत्कालीन नेकपा चुकेको ओलीको प्रतिवेदनमा उल्लेख छ । ०७४ सालको निर्वाचनपछि पनि दाहालले एमालेसँग नभई कांग्रेससँग मिलेर सरकार बनाउने षडयन्त्र गरेको दाबी प्रतिवेदनमा गरिएको छ ।

दाहालले आफ्नो निवासलाई पार्टीको हेडक्वार्टर बनाएको आरोप प्रतिवेदनमा लगाइएको छ । फागुन ०७६ देखि प्रधानमन्त्रीबाट आफूलाई हटाउने षडयन्त्र पार्टीभित्रैबाट सुरु भएको उल्लेख ओलीले आफ्नो प्रतिवेदनमा गरेका छन् ।

दाहालले मुलुकमा कायम भएको राजनीतिक स्थिरता उल्ट्याउने प्रयास गरेको आरोप प्रतिवेदनमा लगाइएको छ । नेकपाको महाधिवेशनको तयारी नगरिएको आरोप पनि लगाइएको छ । अध्यक्षविरुद्ध अभियोग पत्र दर्ता गरिएको पनि उल्लेख गरिएको छ ।

सडकबाटै पार्टी अध्यक्षलाई पदबाट हटाउने काम भएको उनले उल्लेख गरेका छन् । केन्द्र र प्रदेशका सरकारहरू हटाउने षडयन्त्र गरिएको उनले बताएका छन् ।

२३ फागुन ०७७ को सर्वोच्च अदालतको फैसलापछि पुनः पार्टीलाई नयाँ नाम दिएर अगाडि बढ्ने कुरामा प्रचण्डमा रुचि नदिएको दाबी पनि गरिएको छ ।

पार्टी एक नरहनुमा माधवकुमार नेपालको कुण्ठा र विभाजनकारी गतिविधि पनि जिम्मेवार रहेको आरोप प्रतिवेदनमा लगाइएको छ ।