संस्थापक नेताहरू बिनाको एमाले विधान महाधिवेशन
शुक्रबारदेखि एमालेको विधान महाधिवेशन सुरु हुँदैछ, जसमा पार्टीका संस्थापक नेताहरू नै उपस्थित हुने छैनन्।
काठमाडौं, असोज १५ : शुक्रबारदेखि एमालेको विधान महाधिवेशन सुरु हुँदैछ, जसमा पार्टीका संस्थापक नेताहरू नै उपस्थित हुने छैनन् ।
लामो समय एमालेलाई नेतृत्व दिएका माधवकुमार नेपाल र झलनाथ खनालले एमालेबाट अलग भएर नेकपा (एकीकृत समाजवादी) गठन गरेका छन् । संस्थापक नेता मुकुन्द न्यौपाने पनि सोही पार्टीको तेस्रो वरियतामा छन् । वामदेव गौतम पनि एमालेका सबै जिम्मेवारीबाट राजीनामा दिएर अहिले स्वतन्त्र हैसियतमा बसेका छन् ।
आगामी पाँच वर्षका लागि पार्टीको सांगठनिक संरचना र राजनीतिक कार्यदिशा तय गर्ने विधान महाधिवेशन एमालेको इतिहासमा पहिलोपटक आयोजना हुन लागेको छ । एकअर्को महाधिवेशनबीचमा एकपटक विधान महाधिवेशन सम्पन्न गर्ने एमालेको विधानमा उल्लेख छ ।
पहिलो विधान महाधिवेशनमा करिब ६ हजार नेता–कार्यकर्ता सहभागी हुँदैछन् । केन्द्रीय सदस्यहरू, संघ र प्रदेशका सांसदहरू, प्रदेश कमिटीका सदस्यहरू, विभागबाट चुनिएका प्रतिनिधि, जिल्ला कमिटीका प्रतिनिधि, जिल्ला समन्वय समिति प्रमुख र उपप्रमुख, पालिकाका प्रमुख र उपप्रमुख, भातृ संगठनका प्रतिनिधि र प्रवास कमिटीका प्रतिनिधि विधान महाधिवेशनमा सहभागी हुनेछन् ।
तीनदिने महाधिवेशनमा एमाले अध्यक्ष केपी ओलीले राजनीतिक, महासचिव ईश्वर पोखरेलले संगठनात्मक र उपमहासचिव विष्णु पौडेलले विधान संशोधन प्रस्ताव प्रस्तुत गर्नेछन् । ती प्रतिवेदनमाथि समूहगत छलफलपछि फ्लोरले पारित गर्नेछ । ललितपुर गोदावरीस्थित सम्मेलन केन्द्रमा बिहानैदेखि एमाले नेता–कार्यकर्ताको चहलपहल सुरु भइसकेको छ ।
