एमाले विधान महाधिवेशनको सबै तयारी पूरा (विज्ञप्तिसहित)

काठमाडौं, असाेज १४ : तीन दिन चल्ने एमाले विधान महाधिवेशन भोलि (शुक्रबार) सुरु हुँदैछ। त्यसका लागि सबै तयारी सकिएको एमालेले बताएको छ।

महाधिवेशन मूल व्यवस्थापन समितिले आज (बिहीबार) पत्रकार सम्मेलन गरेर विधान महाधिवेशनमा ६ हजार नेता कार्यकर्ता सहभागी हुने बताएको छ।  

महाधिवेशन ललितपुरको गोदावरीस्थित गोदावरी सनराइज सम्मेलन केन्द्रमा हुने जनाइएको छ।

‘मूल सभाहलमा तीन हजार प्रतिनिधि, हलको दायाँबायाँ एक/एक हजार प्रतिनिधि तथा हलको दायाँबायाँका प्यासेजहरूको माथिल्लो भागमा टेन्ट टाँगेर थप आवश्यक पर्न सक्ने एक/एक हजार क्षमताका हल निर्माण गरिएको छ,’ मूल व्यवस्थापन समितिका संयोजक रामबहादुर थापाले जारी गरेको विज्ञप्तिमा भनिएको छ।

महाधिवेशनमा सहभागीलाई बिहानको खाना र दिउँसोको खाजा पार्टीले वयवस्था गर्ने र बेलुकीको खाना र बासस्थानको व्यवस्था भने आफैंले गर्नुपर्ने जनाइएको छ। 

सवारीसाधन नहुने जनप्रतिनिधिलाई सातदोबाटोबाट पार्टीका झन्डावाल गाडीले महाधिवेशनस्थल गोदावारी लैजानेछ भने बेलुका फेरि सातदोबाटोमै ल्याएर छाड्ने जानकारी पनि पत्रकार सम्मेलनमा दिइएको छ।