संसदको गतिरोध अन्त्यका लागि प्रधानमन्त्री देउवाले बिहीबार बिहान १० बजे बोलाए सर्वदलीय बैठक

काठमाडौं, असोज १३ : संघीय संसदका दुवै सदनमा जारी गतिरोध अन्त्यका लागि प्रधानमन्त्री शेरबहादुर देउवाले बिहीबार बिहान १० बजे सर्वदलीय बैठक बोलाएका छन् ।

प्रधानमन्त्री देउवाले संघीय संसदमा उपस्थित दलहरूको बैठक बोलाएका हुन् । संघीय संसदमा कांग्रेस, एमाले, माओवादी केन्द्र, नेकपा (समाजवादी केन्द्र), जसपा, लोसपा, राष्ट्रिय जनमोर्चा, राप्रपाको उपस्थिति छ ।

एकीकृत समाजवादीका अध्यक्ष माधवकुमार नेपालसहित आफ्ना तत्कालीन १४ जना सांसदलाई पदबाट बर्खास्त गर्न माग गर्दै प्रमुख प्रतिपक्षी दल एमालेले २३ भदौदेखि सुरु भएको संघीय संसद अधिवेशनअन्तर्गत प्रतिनिधिसभा र राष्ट्रियसभाका बैठक अवरुद्ध गर्दै आएको छ ।

नेकपा (एकीकृत समाजवादी) दर्ता प्रयास सुरु भएपछि एमालेले ती सांसदलाई पदबाट हटाउन संघीय संसदमा सूचना दर्ता गराएको थियो । तर, सभामुख अग्निप्रसाद सापकोटाले सूचना टाँस नगरी एमाले विभाजनमा साथ दिएको आरोप उक्त पार्टीले लगाउँदै आएको छ ।