तारा एयरले असोज २३ देखि पोखरा-जोमसोम नियमित उडान गर्ने

काठमाडौं, असोज १२ : यती एयरलाइन्सको भगिनी संस्था तारा एयरले आगामी असोज २३ देखि पोखरा-जोमसोम उडानलाई नियमित गर्ने भएको छ। 

विश्वका विभिन्न मुलुकसहित नेपालमा पनि कोरोना भाइरस सङ्क्रमण देखिएसँगै बन्द रहेको धार्मिक तीर्थस्थल मुक्तिनाथ मन्दिर खुला गरेसँगै तारा एयरले पनि आफ्नो बन्द रहेको उडानलाई सुचारु गर्न लागेको हो। 

यती एयरलाइन्सका प्रवक्ता एवं हवाई सुरक्षा प्रमुख सुदर्शन बर्तौलाले नजिकिँदो चाडपर्व र मुक्तिनाथ दर्शनका लागि जाने यात्रुलाई लक्षित गरेर पोखरा-जोमसोम उडान सुचारु गर्न लागेको जानकारी दिए।

‘राति पोखरामा जहाज राखेर तारा एयरको १९ सिटे विमानमार्फत दैनिक उडान गर्न लागेका छौं,’ उनले भने, ‘कोरोना महामारीका कारण बन्द हुनुभन्दा पहिले ताराले पोखरा-जोमसोम यात्रुको चाप हेरेर दैनिक पाँचदेखि सात उडान भर्दै आएको थियो।’ 

जोमसोममा दिउँसो हावा चल्ने भएकाले वायुसेवा कम्पनीले बिहान १२ बजेभित्र नै उडान भरिसक्नुपर्ने हुन्छ। दुर्गममा उडान गर्ने वायुसेवामा तारा एयरले मात्र पोखरा, नेपालगञ्ज र काठमाडौंमा नियमित वायुयान राखेर दुर्गम क्षेत्रमा सेवा दिँदै आएको छ। 

तारा एयरसँग हाल दुर्गममा उडान भर्न  चारवटा टुइनवटर विमान रहेका छन्। यसमार्फत लुक्ला, फाप्लु, सिमिकोट, डोल्पा, मुगु, जुम्ला, बाजुरालगायत दुर्गमका विमानस्थलमा नियमित तथा चार्टर उडान भर्दै आएको छ।