डेढ अर्ब बढ्यो मलको अनुदान : पहिले साढे १०, अहिले १२ अर्ब

काठमाडौं, असोज ११ : सरकारले चालू आवमा ५ लाख १८ हजार मेट्रिकटन रासायनिक मल आयात गर्ने भएको छ। गत वर्षको तुलनामा करिब एक लाख भन्दा बढी मल आयात गर्न लागिएको आज (सोमबार) काठमाडौंमा आयोजित कार्यक्रममा  जानकारी  दिइयो। 

मलखाद व्यवसायी सङ्घ नेपालको पाँचौं साधारणसभा तथा दोस्रो महाधिवेशनमा आयोजित कार्यक्रममा कृषि तथा पशुपक्षी मन्त्रालयका सचिव कृष्णप्रसाद आचार्यले मल आयातमा गत वर्ष रु १० अर्ब ५० करोडको अनुदान दिइएकामा यसवर्ष रु. १२ अर्बको अनुदान दिन लागिएको जानकारी दिए। 

अर्का सचिव डा गोविन्द शर्माले कृषि उत्पादनमा आवश्यक रहेको मल वितरण प्रक्रियामा निजी क्षेत्रको संलग्नता रहे पनि मूल्य निर्धारणमा एक रुपता नरहेको भन्ने गुनासो आएकोमा चिन्ता व्यक्त गर्नुभयो। सरकारले तोकेको मूल्यमा व्यवसायीले किसानको खेतबारीमा मल पुर्‍याउनुपर्नेमा उनले जोड दिए। 

सरकारले साल्ट ट्रेडिङ कर्पोरेसन र कृषि सामग्री कम्पनी लिमिटेडमार्फत मल भारतलगायत अन्य मुलुकबाट आयात गर्ने व्यवस्था छ। किसानको पहुँचमा मल पुर्‍याउन यी संस्थाले केही सहकारी र निजी क्षेत्रका व्यवसायीलाई मल बिक्री गर्ने गर्दछन्।

साल्ट ट्रेडिङ कर्पोरेसन, कृषि सामग्री कम्पनीलगायत संस्थाका प्रतिनिधिले मलको सुरक्षित भण्डारण गर्न नसकेमा त्यसको गुणस्तरमा समस्या आउने उनले बताए।