प्रदेशवासीलाई स्वच्छ खानेपानी उपलब्ध गराइनेछ : मुख्यमन्त्री पोखरेल
पोखरा, असोज ७ : गण्डकी प्रदेशका मुख्यमन्त्री कृष्णचन्द्र नेपाली पोखरेलले प्रदेशवासीलाई स्वच्छ खानेपानी उपलब्ध गराउन सरकार प्रतिबद्ध रहेको बताएका छन्।तनहुँको म्याग्दे गाउँपालिका–३ स्थित...
पोखरा, असोज ७ : गण्डकी प्रदेशका मुख्यमन्त्री कृष्णचन्द्र नेपाली पोखरेलले प्रदेशवासीलाई स्वच्छ खानेपानी उपलब्ध गराउन सरकार प्रतिबद्ध रहेको बताएका छन्।
तनहुँको म्याग्दे गाउँपालिका–३ स्थित कोइरालाथोक तिलाहारे खानेपानी तथा सरसफाइ आयोजनाको आज उद्घाटन गर्दै मुख्यमन्त्री पोखरेलले खानेपानीको सुविधाबाट वञ्चित रहेका गाउँ बस्तीमा खानेपानी सुविधा पुर्याइने बताए।
हालसम्म गण्डकी प्रदेशका ९४ प्रतिशत नागरिकले आधारभूत खानेपानी सुविधा प्राप्त गरिसकेको बताउँदै मुख्यमन्त्री पोखरेलले बाँकी रहेका घरधुरीमा पनि चाँडै खानेपानी पुग्ने बताए। ‘एक घर : एक धारा’ अभियानअन्तर्गत सरकारले हरेक जनताको घरधुरीमा खानेपानी सुविधा पुर्याउँछ,’ उनले भने।
गण्डकी प्रदेशसभा सदस्य डोबाटे विक, सरिता गुरुङ, जिल्ला समन्वय समितिका प्रमुख शान्तिरमण वाग्ले, संविधानसभा सदस्य ध्रुव वाग्ले, म्याग्दे गाउँपालिकाका अध्यक्ष मायादेवी राना लगायतले सो कार्यक्रममा मन्तव्य व्यक्त गरेका थिए।
खानेपानी आयोजनाका लागि प्रदेश सरकारले रु. ४४ लाख, म्याग्दे गाउँपालिकाले रु. २५ लाख लगानी गरेको छ भने स्थानीयवासीले रु. ११ लाखको साझेदारी गरेका छन्।
डिप बोरिङ प्रणालीबाट १४६ घरधुरीका ८ सय उपभोक्ता लाभान्वित भएका छन्। खानेपानी सुविधा नहुँदा पँधेरा र कुवाबाट पानी ल्याउन बाध्य यहाँका स्थानीयवासी घरघरमै पानी आएपछि खुशी भएका छन्।
