मोटरसाईकल चोरीमा संलग्न २ जना ट्राफिक प्रहरीको नियन्त्रणमा

काठमाडौं, भदौ २९ : महानगरीय ट्राफिक प्रहरी महाशाखाले मोटरसाईकल चोरी गर्ने २ जनालाई मोटरसाईकलसहित नियन्त्रणमा लिएको छ। 

महाशाखाको पीडित सहायता ईकाइबाट सादा पोसाकमा खटिएको ट्राफिक प्रहरी टोलीले प्रदेश ३ ०२ ०१२ प ७१९० नम्वरको कालो रातो रंङको २२० सी.सी.को पल्सर मोटरसाईकल सवार गरिरहेको अवस्थामा नियन्त्रणमा लिएको हो।

प्रहरीले उनीहरुलाई गोदावरी न.पा. वडा नं. १० चापागाँउबाट नियन्त्रणमा लिएको ट्राफिक महाशाखाका प्रमुख प्रहरी वरिष्ठ उपरीक्षक जनक भट्टराईले जानकारी दिए।

पक्राउ पर्नेमा ललितपुर गोदावारी नगरपालिका १० का २४ वर्षीय विजय तामाङ्ग र २६ वर्षीय रविन्द्र तामाङ्ग रहेका छन्। 

अनुसन्धानको क्रममा उक्त मोटरसाईकलको वास्तविक नं. प्रदेश ३ ०२ ०१२ प ७९९७ खुल्न आएको महाशाखाले जनाएको छ। 

उक्त नम्वरको मोटरसाईकल काठमाण्डौ, किर्तिपुर नगरपालिका वडा नं. ३ समलबाट हराएको हुँदा खोजतलास गरी पाउँ भनी काठमाण्डौ किर्तिपुर नगरपालिका वडा ६ बस्ने प्रजोल महर्जनले ट्राफिक महाशाखामा दिएको निवेदन दिएका थिए।