बहुविवाहको मुद्दामा छवि र शिल्पाविरुद्ध पक्राउ पूर्जी जारी

काठमाडौं, साउन ८ : प्रहरीले चलचित्र निर्माता छवि ओझा र उनकी कान्छी श्रीमती शिल्पा पोखरेलविरुद्ध पक्राउ पूर्जी जारी गरेको छ। 

महानगरीय प्रहरी परिसर काठमाडौंले बहुविवाहको मुद्दा दर्ता भएपछि छवि र शिल्पाविरुद्ध बुधबार पक्राउ पूर्जी जारी रहेको हो। छविकी जेठी श्रीमती हेमा ओझाले छवि र शिल्पाविरुद्ध आइतबार महानगरीय प्रहरी वृत्त गौशालामा बुहविवाहको उजुरी दर्ता गराएकी थिइन्।

बहुविवाहको उजुरी दर्तापछि उनीहरुलाई पक्राउ गर्न पुर्जी काटिएको महानगरीय प्रहरी परिसर काठमाडौंका एसपी अशोक सिंहले जानकारी दिए। छवि र शिल्पाबीच सम्बन्धमा चिसोपना आएपछि सम्बन्धविच्छेदको कुरा चलिरहेका बेला हेमाले बहुविवाहको उजुरी दिएकी थिइन्। 

हेमाले छविसँग आफ्नो विहे २०४१ सालमा भएको र दुई वटा छोराहरु पनि रहेको उल्लेख गर्दै बहुविवाहको मुद्दा दिएकी थिइन्। 

यो पनि: जेठी पत्नी हेमाले दिइन् छवि-शिल्पाविरुद्ध बहुविवाहको उजुरी

हेमाले छवि र शिल्पाबीचको सम्बन्धबारे मिडियामा चर्चामा आएपछि आफूले के हो भनेर प्रश्न सोधे पनि छविले अर्को विवाह गरेको प्रमाण के छ भनेर जवाफ फर्काएको उजुरीमा उल्लेख गरेकी थिइन्। हेमाले छविको अफिसका कर्मचारीबाट बिहे दर्ताको कागजात पाएकाले सोही आधारमा बहुविवाहको मुद्दा दिएको बताएकी थिइन्।

हेमाले प्रश्न गर्दै भनेकी छिन्, 'घरमा श्रीमती म हुँदाहुँदै छोरी भन्न सुहाउने उमेरकी शिल्पा पोखरेलसँग विवाह गरेकाले म यो जाहेरी लिएर उपस्थित भएकी छु।' हेमाले छवि र शिल्पा दुबैलाई नियन्त्रणमा लिएर कानूनी कारबाही गर्न माग गरेकी छिन्।

हेमाले छवि र आफूबाट छोराहरु महेश र राजीव ओझा रहेको पनि दाबी गरेकी छिन्।