केसीको माग पूरा नगरे चिकित्सकहरुले झन कडा आन्दोलन गर्ने 

काठमाडौं, माघ १४ : डा.गोविन्द केसीको जीवन रक्षाको माग गर्दै रिले अनसन बसेका चिकित्सकहरूले केसीको माग पूरा नहुँदासम्म आन्दोलन जारी राख्ने बताएका छन् ।

काठमाडौंको त्रिवि शिक्षण अस्पताल परिसरमा अनसन बसेका चिकित्सकहरुले आफूहरुको शान्तिपूर्ण अनसनमा सरकारले दमन गर्न खोजेको आरोप पनि लगाए ।

नेपाल चित्सिक संघका अध्यक्ष डा. मुक्तिराम श्रेष्ठको अन्तर्वार्ता

नेपाल चित्सिक संघका अध्यक्ष डा. मुक्तिराम श्रेष्ठले जबसम्म माग पूरा नभई डाक्टर केसीले अनसन तोड्दैनन् तबसम्म चिकित्सक आन्दोलन पनि नरोकिने बताए ।

अब समाधान के त भन्ने प्रश्नमा डा. श्रेष्ठले भने, ‘समाधानको उपाय सजिलो छ । राज्यले साउन १० गते अनसन तोडाउन डा. केसीसंग गरेको सम्झौता कार्यान्वयन गरी अहिलेको अनसन ताडाउनुपर्छ । त्यसपछि हाम्रो आन्दोलन पनि रोकीन्छ ।’

आज देशभरिका चिकित्सकले सेवा प्रभावित हुनेगरी आन्दोलन नगरेको बताउँदै डाक्टर श्रेष्ठले भने, ‘भोलिदेखि  देशभरिका डाक्टरले काम गर्ने छैनन् । सेवा ठप्प पारी आन्दोलनमा आउँदा सेवाग्राहीलाई पनि समस्या हुनसक्छ ।’

चिकित्सकहरुले आफुहरुको आन्दोलन डा.केसीको जीवन रक्षाका लागि भएको बताउँदै उनले भने, ‘आन्दोलन गरेर भोलि प्रधानमन्त्री÷मन्त्री हुने आशा हैन, मात्रै केसीको माग सम्बोधन गर्न सरकारलाई दबाब हो ।’