रोकिराखेको मोटरसाइकलमै भेटियो बृद्धको शव

विराटनगर, साउन ५ : मोरङको विराटनगरमा रोकिराखेको मोटरसाइकलमै एक जना बृद्धको शव भेटिएको छ।

गएराति विराटनगर महानगरपालिका ५ बिजुली अफिस चोकमा मोटरसाइकलमा बसेको जस्तै अवस्थामा बृद्धको शव भेटिएको हो। जिल्ला प्रहरी कार्यालयका अनुसार को ४ प २३१६ नम्बरको मोटरसाइकलमा विराटनगर ५ मुनालपथका ६७ वर्षीय सुदर्शन न्यौपाने मृत भेटिएका हुन्।

उनको शव परीक्षणका लागि कोशी अस्पताल पठाइएको छ। घटना शंकास्पद रहेको र अनुसन्धान भइरहेको जिल्ला प्रहरी कार्यालयले जनाएको छ।

प्रहरीका अनुसार उनको प्यान्ट च्यातिएको र दाहिने हातमा पनि चोट देखिएको छ। थप अनुसन्धानका लागि प्रहरी टोली खटिएको छ।