टिपर र मोटरसाइकल ठोक्किँदा दुईको मृत्यु

पोखरा, असार ७ : कास्कीको पोखरा–बाग्लुङ सडकखण्डमा भएको सवारी दुर्घटनामा परी दुई युवाको मृत्यु भएको छ। 

पर्वतको भुकताङले बस्ने ३२ वर्षीय विनोद मल्ल मृत्यु भएको जिल्ला प्रहरी कार्यालयले जनाएको छ। प्रहरीका अनुसार अर्का अन्दाजी ४४ वर्षीय पुरुषको परिचय खुल्न सकेको छैन। 

पर्वतबाट पोखरातर्फ आउँदै गरेको प्रदेश नं ३–०१–००३ क ५१७३ नम्बरको टिपर र पोखराबाट पर्वत जाँदै गरेको ग २० प ६०३० नम्बरको मोटरसाइकल आइतबार साँझ कास्कीको अन्नपूर्ण गाउँपालिका–३ स्थित पोखरा–बाग्लुङ सडकखण्डको लक्ष्मीदेउराली पत्थरढुङ्गामा एकापसमा ठक्कर खाँदा दुर्घटना भएको जिल्ला प्रहरी नायब उपरीक्षक सुवास हमालले जानकारी दिए।

दुर्घटनामा गम्भीर घाइते मोटरसाइकलमा सवार दुवै जनालाई उपचारका लागि पोखरा ल्याइएकोमा उपचारका क्रममा मृत्यु भएको प्रहरीले जनाएको छ। टिपर चालक सिन्धुपाल्चोक इन्द्रावती गाउँपालिका–१० बस्ने २५ वर्षीय सुरेश माझी र दुवै सवारी साधनलाई नियन्त्रणमा लिइएको र घटनाको अनुसन्धान भइरहेको प्रनाउ हमालले जानकारी दिए।