३७ अंकले बढ्यो नेप्से, पुनर्बिमाको उच्च कारोबार 

काठमाडौं, माघ १९ :   धितोपत्र बजारमा आज सेयर कारोबार मापक नेप्से परिसूचक ३७.७० अंकले वृद्धि भएको छ । नेपाल स्टक एक्सचेन्जका अनुसार नेप्से परिसूचक २ हजार ४०८.२४ मा पुगेको छ । यस्तै सेन्सेटिभ परिसूचक ४.९५ अंकले बढेर ४३७.२८ मा पुगेको छ ।     

स्टकका अनुसार २०३ कम्पनीका १ करोड ३३ लाख ११ हजार ९४२ कित्ता सेयर ६ अर्ब ९७ करोड २९ लाख ३६ हजार ५२९ मा खरिद बिक्री भए । आजको कारोबारपछि कुल बजार पुँजीकरण  ३२ खर्ब ४३ अर्ब ७८ करोड ७५ लाख ४० हजार बराबर पुगेको छ । कारोबार भएका कुल १२ मध्ये दुई उपसमूहको सेयर ओरालो लागेको छ । बैंकिङ २०.०४, व्यापार ४९.४९, होटल १७५.०६, विकास बैंक ५३.३२, जलविद्युत् ३३.६, वित्त ३९.५५, निर्जीवन बिमा १२४.६६, उत्पादन १२०.३७, अन्य ५४.०८ र जीवन बिमा ३७९.११ अंकले बढ्दा लघुवित्त २७.८१ अंकले घटेको छ । सामूहिक लगानी कोषको एकाइ भने तटस्थ देखिएको छ ।     

कारोबार रकमका आधारमा पुनर्बीमा कम्पनी शीर्ष स्थानमा रह्यो । सो कम्पनीको सेयर  ५८ करोड ३३ लाख ७७ हजार ९२३ मा खरिद बिक्री भयो । यस्तै नेशनल लाइफ इन्स्योरेन्स कम्पनी  २९ करोड ९९ लाख आठ हजार २९७, नेपाल लाइफ इन्स्योरेन्स  २७ करोड ३८ लाख ५५ हजार ४०१, सेन्चुरी कमर्सियल बैंक २६ करोड ९८ लाख ८७ हजार ४०, शिखर इन्स्योरेन्स  २० करोड ६४ लाख पाँच हजार ७७९ र एनआइसी एसिया बैंकको सेयर  १७ करोड ७५ लाख ५९ हजार ८० मा खरिद बिक्री भयो ।     

आज सेन्चुरी कमर्सियल बैंक र प्रोगेसिभ फाइनान्स लिमिटेडका लगानीकर्ताले सर्वाधिक १०.१० प्रतिशतले कमाए । यस्तै पोखरा फाइनान्स ९.९६, प्रभु लाइफ इन्स्योरेन्स ९.९५, माउन्टेन इनर्जी नेपाल ९.९१, सोल्टी होटल लिमिटेड ९.९० र तारागाउँ रिजेन्सी होटल लिमिटेडका सेयरधनीले ९.८५ प्रतिशतले कमाए ।    

कालिका माइक्रोक्रेडिट डेभलपमेन्टका शेयरधनीले ७।२७ प्रतिशतले गुमाए । यस्तै गुराँस लघुवित्त वित्तीय संस्था ५.६०, सारथी नेपाल लघुवित्त वित्तीय संस्था ४.४५, सामुदायिक लघुवित्त वित्तीय संस्था ३.८६, मिर्मिरे माइक्रोफाइनान्स डेभलपमेन्ट बैंक ३.४८ र स्वरोजगार लघुवित्त विकास बैंकका लगानीकर्ताले ३.४० प्रतिशतले गुमाए ।