भन्सार छलेर ल्याइएको गाडी र कपडा बरामद   

टीकापुर– सत्ती भन्सार कार्यालय कैलालीले भन्सार छलेर ल्याइएको सामग्री बरामद गरेको छ । भन्सार कार्यालयको गस्ती टोलीले आज बिहान  ६ लाख २५ हजार ७० मूल्यबराबरको कपडा र सौन्दर्य प्रशाधनका सामान तथा ९ लाख मूल्य बराबरको पिकअप भ्यान बरामद गरेको हो ।    

भन्सार कार्यालयले टीकापुर नगररपालिका–८ वनगाउँ नजिकैबाट लुकाइछिपाइ ल्याइँदै गरेको अवस्थामा से१प २१४८ नम्बरको महेन्द्रा बोलेरो पिकअप भ्यान, ११ गाँठ कपडा र सौन्दर्य प्रशाधनका सामान बरामद गर्नाका साथै दुई व्यक्तिलाई पक्राउ गरेको हो ।    

भन्सार कार्यालयका प्रमुख विमल शाहले सामान बरामदपछि अनुसन्धान जारी रहेको बताए   । ‘बरामद भएका सामान अनुसन्धानपछि लिलाम गरिनेछ,’ शाहले भने,  ‘‘भन्सार छली ल्याउनेलाई बिगोबमोजिमको जरिवाना र सजायसमेत हुन सक्ने व्यवस्था छ ।’