स्कारपियोले मोटरसाइकललाई ठक्कर दिँदा दुई जनाको मृत्यु

विराटनगर, पुस १४ : पूर्व–पश्चिम राजमार्गअन्तर्गत मोरङको पथरीशनिश्चरे नगरपालिका २ स्थित हरियाली सामुदायिक वन अगाडि स्कारपियो मोटरसाइकललाई ठक्कर दिँदा दुई जनाको मृत्यु भएको छ।

पूर्वबाट पश्चिमतर्फ आउँदै गरेको को १ च ९९४५ नम्बरको स्कारपियोले पूर्वतर्फ जाँदै गरेको मे ११ प ८२८० नम्बरको मोटरसाइकललाई ठक्कर दिँदा दुर्घटना भएको प्रहरीले जनाएको छ।

दुर्घटनामा मोटरसाइकल चालक मोरङको मिक्लाजुङ गाउँपालिका–४ का ३५ वर्षीय सन्तोष लिम्बू र मोटरसाइकलमा सवार २२ वर्षीय सुनिल विकको मृत्यु भएको प्रहरीले जनाएको छ।

चालक लिम्बूको घटनास्थलमै मृत्यु भएको हो भने गम्भीर घाइते विकको उपचारका क्रममा विराटनगरस्थित न्युरो अस्पतालमा मृत्यु भएको हो।