२१ वर्षीया युवती ओछ्यानमै मृत भेटिइन

लहान, वैशाख २० : सिरहा नगरपालिका–१४ खिरौनामा २१ वर्षीया युवती ओछ्यानमै मृत भेटिएकी छन्।

आज बिहान सिरहा नगरपालिका–१४ खिरौनाकी २१ वर्षीया मनिषाकुमारी मण्डल आफ्नै ओछ्यानमा मृत भेटिएको प्रहरीले जनाएको छ।

मनिषाको शव परीक्षणका लागि जिल्ला अस्पताल सिरहामा ल्याएको जिल्ला प्रहरी कार्यालय सिरहाका प्रहरी नायब उपरीक्षक माधवराज खरेलले बताए। उनको हत्या हो वा आत्महत्या त्यस सम्बन्धमा अनुसन्धान भइरहेको खरेलले बताए।

यता स्थानीयवासीले घरपरिवारकै सदस्यबाट मनिषाको हत्या भएको हुनसक्ने आशंका गरेका छन्। गत फागनु १७ गते रामेश मण्डलसँग मनिषाको विवाह भएको थियो।

विहेका बेला दिएको दाइजो कम भएको भन्दै परिवारले मनिषालाई पटक–पटक शारीरिक यातना तथा कुटपिट गर्दै आएको माइतीपक्षको आरोप छ।