काभ्रेका जनप्रतिनिधिमा फैलँदो कोरोना संक्रमण

काभ्रेपलाञ्चोक, कात्तिक १८ : बेथानचोक गाउँपालिकाका अध्यक्ष प्रेमबहादुर तिमल्सिनालाई सोमबार कारोना पोजेटिभ पुष्टि भयो। कोरोना भाइरस संक्रमण पुष्टि भएलगत्तै उनी ढुङ्खर्कस्थित होम आइसोलेशनमा छन्। उनले पछिल्ला केही दिनदेखि आफूसँग सम्पर्कमा रहेकाहरुमा सतर्कताको अपिल गरेका छन्।

पनौती नगरपालिका प्रमुख भीमप्रसाद न्यौपाने पनि हप्तादेखि कोरोना संक्रमणका कारण होम आइसोलेशनमै छन। बनेपा नगरप्रमुख लक्ष्मीनरसिं वादे, उपप्रमुख रेखा दाहाल सापकोटालगायत दुई वडाध्यक्ष कोरोना संक्रमणसँग जुधिरहेका छन्। संक्रमित सबै जनप्रतिनिधि हाल होम आइसोलेशनमै छन्। परिवारसहित संक्रमित धुलिखेल नगर प्रमुख अशोककुमार ब्याञ्जू श्रेष्ठ भने हालै मात्र कोरोनामुक्त भएका छन्।

पछिल्लो समय काभ्रेपलाञ्चोकमा तीव्र गतिमा कोरोना संक्रमण फैलिरहेसँगै स्थानीय तहका प्रमुखलगायत जनप्रतिनिधिमा कोरोना संक्रमण बढ्दै गएको हो। हालसम्म संक्रमित हुनेमा स्थानीय तहका चार प्रमुख छन। स्थानीय जनप्रतिनिधि तथा कर्मचारीमा कोरोना संक्रमण हुँदा पालिका तथा वडा कार्यालयबाट नियमित प्रवाह भइरहेका सेवा प्रभावित बनिरहेका छन्।

‘जनप्रतिनिधिहरु पनि सुरक्षाकर्मी र स्वास्थ्यकर्मी जस्तै फ्रन्टलाइनमा खट्नुहुन्छ, उनीहरुलाई स्वास्थ्य–सुरक्षाको उच्च जोखिम हुनु स्वाभाविक हो, तर पनि सजगता अपरिहार्य छ नै,’ कोभिड–१९ रोकथाम तथा नियन्त्रण, कमाण्ड पोष्टका सदस्यसचिव एवं जिल्ला स्वास्थ्य कार्यालय प्रमुख डा नरेन्द्र झाले भने, उनका अनुसार यसअघि स्थानीय तहका करीब १२ वडा जनप्रतिनिधिमा संक्रमण देखिइसकेको छ।

यस्तै प्रमुख जिल्ला अधिकारी शिवराम पोखरेललाई सोमबार संक्रमण पुष्टि भएपछि आजदेखि एक हप्ताका लागि जिल्ला प्रशासन कार्यालयको सेवा बन्द गरिएको छ। सहायक प्रजिअ लक्ष्मीदेवी होमागाइंले सोमबार नै विज्ञप्तिमार्फत प्रजिअलगायत केही कर्मचारीमा कोरोना संक्रमण देखिएपछि अत्यावश्यकबाहेकको सेवा यही कात्तिक २४ गतेसम्मका लागि बन्द गरिएको उल्लेख गरेका छन्। 

यसैबीच काभ्रेपलाञ्चोकमा सोमबारसम्म कूल संक्रमितको संख्या एक हजार ७७५ पुगेको छ। यसमध्ये ७० प्रतिशत अर्थात् एक हजार २२६ कोरोनामुक्त भइसकेको पोष्टले जनाएको छ। हाल कोरोना सक्रिय संक्रमितमध्ये ४४ प्रतिशत अर्थात् २२९ बनेपा नगरका हुन्। धुलिखेलमा ११०, पनौतीमा ८२, पाँचखालमा २६, नमोबुद्धमा १६, मण्डनदेउपुरमा ३४, रोशी र बेथानचोकमा छ–छ, तेमालमा तीन तथा भुम्लु, महाभारत, खानीखोला र   चौँरीदेउरालीमा एकएक संक्रमित छन्। 

हाल सक्रिय संक्रमितमध्ये अस्पताल आइसोलेशनमा ४९ र होम आइसोलेशनमा ४७९ उपचाररत रहेको पोष्टले जनाएको छ। काभ्रेपलाञ्चोकमा हालसम्म १४ पुरुष र सात महिला गरी २१ को कोरोना संक्रमणका कारण मृत्यु छ। पोष्टका अनुसार २४ घण्टामा ४८ पुरुष र ४४ महिला गरी ९२ नयाँ कोरोना संक्रमित थपिएका हुन्।