सप्तरीमा हात्ती आतंक : पाँच घरमा तोडफोड

सप्तरी, भदौ १६ : कोशी टप्पु वन्यजन्तु आरक्षबाट आएको जंगली हात्तीको समूहले सप्तरीको उत्तरी क्षेत्रमा गएराति पाँच वटा घरमा तोडफोड गरेर क्षति पु¥याएको छ। 

जिल्लाको कञ्चनरुप नगरपालिका–१० बदगामामा गए राति जंगली हात्तीको समूहले पाँच वटा घरमा तोडफोड गरेर क्षति पुर्‍याएको हो। 

कोशी टप्पु वन्यजन्तु आरक्षबाट नौ वटाको समूहमा आएको जंगली हात्तीले कञ्चनरुप नगरपालिका–१० बदगामामा पाँच वटा घरमा तोडफोड गरेको वडाध्यक्ष दिलीप चौधरीले जनाकारी दिए। सो हात्तीको समूहले स्थानीय सम्झाना देवी यादवको एक, मनोज गुप्ताको एक, जयकृष्ण कुमार कुसियैतको दुई र सुदामा कुसियैतको एक वटा घरमा तोडफोड गरेको वडाध्यक्ष चौधरीले बताए।

हात्तीले घरमा तोडफोड गर्दा घरभित्र रहेका चार ड्रम चामल, तीन ड्रम गहुँ र अन्य अन्नपात खानुका साथै घरको आँगनमा रहेको खानेपानी ट्युबेलसमेत उखेलेर फालेको पीडित सञ्जय कुसियैतले जानकारी दिए। ती हात्तीलाई स्थानीयवासी र इलाका प्रहरी कार्यालयबाट गएको प्रहरी टोलीले धपाउन सफल भएको जिल्ला प्रहरी कार्यालयले जनाएको छ। 

सो क्षेत्रमा दैनिक हात्ती आतंक बढेपछि स्थानीय जाग्रामसमेत बस्न बाध्य रहेको सोही ठाउँका अञ्जनी यादवले गुनासो गरे। विगत ६ महिनादेखि कोरोना संक्रमण फैलिएर घरमै बस्नुपर्ने बाध्यता रहेको बेला जिल्लाको कञ्चनरुप नगरपालिका, सप्तकोशी नगरपालिका अग्निकृष्णसवरण गाउँपालिकाकालगायत करिब दुई दर्जनभन्दा बढी गाउँमा दैनिकजसो हात्ती पस्ने गरेको स्थानीयको भनाइ छ। यस क्षेत्रमा बढेको हात्ती आतंकलाई नियन्त्रण गर्न सम्बन्धित निकाय मौन रहेको स्थानीयको भनाइ छ।