बाँकेमा जीपको ठक्करबाट दुईको मृत्यु

राँझा, चैत १६: बाँकेमा स्कार्पियाे जीपको ठक्करबाट दुई जनाको मृत्यु भएको छ।  पूर्व–पश्चिम राजमार्ग अन्तर्गत  कोहलपुर नगरपालिका–३ मदनचोकमा बा १५ च २०९६ नम्बरको स्कार्पियो जीपको ठक्करबाट दुई जनाको मृत्यु भएको हो।  

ठक्करबाट बर्दियाको ठाकुरद्वारा नगरपालिका–८ का ३२ वर्षीया उषा चौधरी र बाँके बैजनाथ गाउँपालिका–१ चिसापानीका ३० वर्षीय लोकबहादुर शाहीको मृत्यु भएको इलाका प्रहरी कार्यालय कोहलपुरका प्रहरी निरीक्षक मानबहादुर विसीले जानकारी दिए। उनका अनुसार मदनचोक नजिकै चौधरी र शाहीले चलाएको भे ५ प १४२० र भे ८ प २१६५ नम्बरको स्कुटर एकआपसमा जुधेका समयमा तीव्र गतिमा आएको स्कार्पियोले दुबै जनालाई ठक्कर दिएको हाे।

दुर्घटनामा गम्भीर घाइते भएका दुबै जनाको कोहलपुरस्थित शिक्षण अस्पतालमा उपचारको क्रममा मृत्यु भएको थियो। स्कार्पियो चालक रोशन वलीलाई प्रहरीले नियन्त्रणमा लिएको प्रहरी निरीक्षक विसीले जानकारी दिए।