पञ्चमी नुहाउन खोलामा गएकी महिलाको बगेर मृत्यु

कास्की, भदौ ७ : कास्कीको माछापुच्छ्रे गाउँपालिका–९ मा कस्युङ खोलाले बगाएर एक महिलाको मृत्यु भएको छ।

आज बिहान २४ वर्षीया दीपा गौतमलाई हरितालिका तीजको पञ्चमी नुहाउन जाँदा बगाएको र चार घण्टापछि मृतावस्थामा फेला पारिएको वडाध्यक्ष दुर्गाबहादुर क्षेत्रीले जानकारी दिए।

खोलाले बगाएपछि स्थानीयले खोजतलासका क्रममा गौतमको शव घटनास्थलबाट अन्दाजी एक ७०० मिटर तल नदी किनारमा फेला पारेका थिए। घटना लगत्तै प्रहरीचौकी घाचोकबाट प्रहरी घटनास्थलमा परिचालन गरिएको जिल्ला प्रहरी कार्यालयले जनाएको छ। 

पोखरा–२४ कास्कीकोट माइती भएकी महिला गर्भवती थिइन्। उनकी साढे दुई वर्षकी छोरी पनि छिन्।