कोरोना संक्रमणबाट काठमाडौंकी एक महिलासहित ६ जनाको मृत्यु

काठमाडौं, भदौ ४ :  कोरोना भाइरसको संक्रमणबाट नेपालमा थप ६ जनाको मृत्यु भएको छ। 

बिहीबार स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले कोरोना संक्रमणबाट काठमाडौंकी एक महिलासहित थप ६ जनाको मृत्यु भएको जानकारी दिए। 

प्रवक्ता गौतमका अनुसार कोरोना संक्रमणबाट पर्सामा एक महिलासहित तीन जना, काठमाडौंमा एक महिला,  मकवानपुर र सप्तरीमा एक–एक जना पुरुषको उपचारका क्रममा मृत्यु भएको हो।  

योसँगै नेपालमा कोरोना संक्रमणबाट मृत्यु हुनेको संख्या १२६ पुगेको छ।  नेपालमा बिहीबार थप ७०७  जनामा कोरोना भाइरसको संक्रमण पुष्टि भएको छ भने  कोरोना संक्रमितको संख्या २९ हजार ६४५ पुगेको छ। संक्रमितमध्ये १७ हजार ९६४ जना निको भएर घर फर्किएका छन्।

प्रवक्ता गौतमका अनुसार बिहीबारमात्रै २५९ जना कोरोनालाई जितेर घर फर्किएका छन्।