नारायणकाजीले भने– म कार्यदलको विपक्षमा छैन 

काठमाडौं, साउन ३२ : नेकपाका प्रवक्ता नारायणकाजी श्रेष्ठले आफू पार्टी भित्रको विवाद समधानका लागि गठन गरिएको कार्यदलको विपक्षमा ‪नरहेको बताएका छन्। कार्यदल गठनपछि श्रेष्ठ लगायतका नेताहरु असन्तुष्ट रहेको चर्चा भइरहेका बेला श्रेष्ठले आफू विपक्षमा नरहेको बताएका हुन्। 

उनले पार्टीका दुई अध्यक्षद्वारा पार्टी भित्रका समस्याहरुको समाधान र संकटको निकासको लागि गृहकार्य गरी सुझाव पेश गर्न गठित कार्यदलले आफ्नो काम शुरु गरिसकेको  र यसले पार्टी एकताको रक्षा सुनिश्चित भएको सन्देश समेत दिएको बताएका छन्।

‘‪मैले यस अघि नै सार्वजनिक रुपमा पार्टी संकटको निकासको सुत्र प्रस्तुत गरिसकेको हुँ, पार्टी एकताको रक्षा, यथास्थितिमा गुणात्मक परिवर्तन र के को निर्णय अनुसार महाधिवेशनको तयारी। पार्टी एकताको रक्षा ले हामी सबैलाई खुसी बनाएको छ,’ श्रेष्ठले फेसबुकमा लेखेका छन्, ‬‘कार्यदलले तात्कालिन रुपमा कोभिड १९ को नियन्त्रण, उपचार र अर्थतन्त्रको पुननिर्माण र अन्ततः राष्टिय स्वाधीनताको रक्षा गर्दै समाजवाद उन्मुख सामाजिक–आर्थिक रुपान्तरण गर्न पार्टी र सरकार सञ्चालनमा के कसरी गुणात्मक परिवर्तन गर्ने भन्ने सुझाव प्रस्ताव पेश गर्नेछ।‬ ‪यसलाई स्थायी कमिटीमा प्रस्तुत गरी खुला र विवेकपुर्ण छलफल गरी संस्थागत निर्णय गरिनेछ।’

श्रेष्ठले कार्यदलको गठनका बारेमा भ्रमात्मक प्रचार गलत भएको बताउँदै पार्टी भित्र केही विषयमा कुनै छलफल ,बहस र संघर्ष भयो भने पार्टी फुट्ने खतरा उत्पन्न भइहाल्न उपयुक्त नहुने भएकाले सचेत बन्नुपर्ने बताएका छन्। उनले पार्टी एकतालाई सुदृढ गर्न स्वस्थ बैचारिक राजनीतिक छलफल र बहसलाई प्रोत्साहित गरिनु पर्ने बताए।