भरतपुर अस्पताल प्रमुखसहित चार चिकित्सकलाई कोरोना

भरतपुर, साउन ३२ : कोरोना रोग उपचारको ‘हब’ अस्पताल भरतपुर अस्पतालका प्रमुख मेडिकल सुपरिटेन्डेन्टसहित चार चिकित्सक र एक स्वस्थ्यकर्मीमा कोरोना भाइरसको सङ्क्रमण देखिएको छ।

अस्पताल विकास समितिका अध्यक्ष डा.भोजराज अधिकारीका अनुसार प्रमुख मेडिकल सुपरिटेण्डेन्ट डा.श्रीराम तिवारी र स्त्री तथा प्रसूतिरोग विभाग प्रमुख डा.सुनिलमणि पोखरेललाई कोरोना सङ्क्रमण देखिएको हो। आकस्मिक कक्षका एक चिकित्सक र एक स्वास्थ्यकर्मीलाई पनि कोरोना सङ्क्रमण देखिएको उनले बताए।

त्यस्तै, अस्पतालमा आवासीय चिकित्सकका रूपमा काम गरेर शनिबार मात्र काठमाडौं फर्किएका एक चिकित्सकमा पनि कोरोना देखिएको छ। काठमाडौंको प्रसूतिगृहपछि सबैभन्दा बढी प्रसूति गराउने अस्पताल भरतपुर अस्पताल हो।

प्रसूति विभागका प्रमुखलाई कोरोना सङ्क्रमण देखिएपछि अन्य स्वास्थ्यकर्मी र बिरामीको कन्ट्याक्ट टे«सिङ गरिँदै छ। तीन दिनअघि गरिएको परीक्षणमा सोही अस्पतालको सघन उपचार कक्षमा कार्यरत एक चिकित्सक र आकस्मिक कक्षमा कार्यरत एक स्वास्थ्यकर्मीमा कोरोना देखिएको अस्पतालका सूचना अधिकारी लीलाधर पौडेलले बताए।

अस्पताल विकास समितिका अध्यक्ष डा.अधिकारीले चिकित्सक र स्वास्थ्यकर्मीमा सङ्क्रमण देखिएको भएपनि अस्पतालको नियमित उपचारमा भने कुनै असर नहुने बताए। उनले भने, “यो सङ्कटको घडीमा जे–जति हामी चिकित्सक, स्वास्थ्यकर्मी स्वस्थ छौँ, उपचारकार्यमा निरन्तर खट्नेछौं।

जिल्लामा रहेका दुई मेडिकल कलेज र निजी अस्पतालसँग समन्वय गरेर कोरोना सङ्क्रमित र अन्यको उपचारमा भरतपुर अस्पतालले नेतृत्वदायी भूमिका निर्वाह गर्ने पनि उनले बताए। अस्पतालका सङ्क्रमणमा परेका चिकित्सक र स्वास्थ्यकर्मीको अवस्था खतरामुक्त रहेको अधिकारीले जानकारी दिए।।

गत सोमबार जिल्लाको अर्को सरकारी अस्पताल रत्ननगर वकुल्लहर अस्पतालका मेडिकल सुपरिटेण्डेन्ट डा.विश्ववन्धु बगाले र उनकी पत्नी र भरतपुर अस्पतालमा नै कार्यरत चिकित्सकमा पनि कोरोना सङ्क्रमण देखिएपछि अहिले घरकै आइसोलेसनमा बसिरहेका छन्।

भरतपुर क्षेत्रमा रोगको सङ्क्रमण निकै बढेपछि शुक्रबार राति १२ बजेदेखि एक साताका लागि महानगर क्षेत्रमा निषेधाज्ञा जारी गरिएको छ। पछिल्लोपटक शनिबार राति आएको नतिजामा २८ जनामा कोरोना पुष्टि भएकामा २७ चितवनका हुन्। तीमध्ये २१ भरतपुर महानगरपालिकाभित्रका छन्।जिल्लामा हालसम्म कोरोना सङ्क्रमितको सङ्ख्या एक सय ९९ पुगेको छ।