युवा अभियन्ता ईले २३औं दिनमा तोडे अनशन

काठमाडौं, साउन २५ : युवा अभियन्ता ईले २३औं दिनमा अनशन तोडेका छन्। सरकार इनफ इज इनफ अभियानबीच सहमतिपछि आइतबार ईले अनशन तोडेका हुन्।

आज बिहान ह्याम्स अस्पतालमा स्वास्थ्य मन्त्रालय र इनफ इज इनफ अभियानबीच १३ बुँदे सहमित भएको छ। सहमतिमा इनफ इज इनफ अभियानका तर्फबाट ई र सरकारका तर्फबाट स्वास्थ्य मन्त्रालयका सहप्रवक्ता डा.समिर अधिकारीले हस्ताक्षर गरेका छन्। सहमतिसँगै ईले अनशन तोडेका हुन्।

इनफ इज इनफ अभियानले प्रेस विज्ञप्ति जारी गरि युवाको स्वतःस्फूर्त अभियानको उपलब्धीस्वरुप पीसीआर परीक्षणको संख्या र दायरा वृद्धि भएको, कोभिड–१९ रोकथाम तथा नियन्त्रणमा स्वास्थ्य मन्त्रालयले तयार गरेको निर्देशिका तथा कार्यविधिहरुको कार्यान्वयन, प्रचारप्रसार गर्ने गराउने काममा सकारात्मक पहल भएको जनाएको छ।

यस अघि पनि ई अनशन बसेका थिए। सरकासँग सहमति भएपछि १२औं दिन असार २२ गते अनशन तोडेका थिए। सहमति कार्यान्वयन नभएपछि उनी पुनः अनशन बसेका थिए।