नेपाल र जापानबीच कामदार लैजाने समझदारी हुँदै

काठमाडौं, चैत ११ः नेपाली कामदारलाई जापान लैजानेसम्बन्धी दुई देशबीच आज श्रमसमझदारी हुँदै छ।

आज हुन लागेको श्रमसमझदारीलाई ‘सहाकार्य गर्ने समझदारी’ भनिएको छ । यसका लागि दिउसो १२ः३० बजे ललितपुरको होटल हिमालयनमा कार्यक्रम राखिएको छ।

त्यही कार्यक्रममा दुवै देशका अधिकारीहरू समझदारीमा हस्ताक्षर गर्ने छन्। यो समझदारीपछि जापानले नेपाली कामदारलाई श्रम भिसामा लैजाने छ । अहिलेसम्म श्रम भिसामा लग्ने गरेको थिएन् । नेपाली विद्यार्थी अध्ययन भिसामा जापान जाने गरेका थिए।

यो समझदारीअनुसार, जापानले अप्रिल १ देखि नेपाली कामदार लैजाने जनाएको छ । तेस्रो पक्षबिना नै नेपाली कामदार सिधै जापान जान पाउने छन्।

यसका लागि श्रम मन्त्रालयले वैदेशिक रोजगार विभागअन्तर्गत छुट्टै शाखा स्थापना गर्नेछ । त्यो शाखाले जापानले माग गरेअनुसारका कामदार पठाउने जनाएको छ।

अहिले दक्षिण कोरिया र इजरायलमा सरकारी स्तरबाटै कामदार पठाउने गरिएको छ । कोरिया नेपाली कामदारका लागि आकर्षक गन्तव्य बनेको छ । जापान पनि त्यस्तै गन्तव्य बन्ने अपेक्षा गरिएको छ।

जापानले पनि दक्ष र अदक्ष कामदार लैजाने जाइएको छ । पाँच वर्षभित्र तीन लाख ४२ हजार दक्ष तथा अदक्ष कामदार भित्र्याउने जापानको लक्ष्य छ । त्यही अनुसार, नेपालबाट पनि कामदार जान पाउने छन्।