दाङमा १० थान चोरीका मोटरसाइकलसहित १४ जना पक्राउ

दाङ,  साउन ४ : दाङमा दश थान चोरीका मोटरसाइकलसहित १४ जना पक्राउ परेका छन्। 

विशेष सूचनाका आधारमा जिल्ला प्रहरी कार्यालयबाट खटिएको प्रहरीको टोलीले जिल्लाका विभिन्न स्थानमा चोरी गरिएका र स्वरुप परिवर्तन गरिएका १० जना मोटरसाइकलसहित १४ जनालाई पक्राउ गरेको जिल्ला प्रहरी कार्यालय दाङका प्रहरी प्रमुख एसपी गणेश चन्दले जानकारी दिए।

आइतबार घोराहीमा पत्रकार सम्मेलन गरी प्रहरीले मोटरसाइकलसहित पक्राउ परेका १४ जनालाई सार्वजनिक गरेको हो। पक्राउ पर्नेमा घोराही उपमहानगरपालिका–१३ का १८ वर्षीय सञ्जय परियार, घोराही–१४ का २३ वर्षीय समिर सुनार, सोही ठाउँका २१ वर्षीय सुवास कार्की, सोही ठाउँकै ३५ वर्षीय केन्द्रबहादुर डाँगी, घोराही–१६ का २१ वर्षीय सागर हमाल, घोराही–१७ का २३ वर्षीय निरज योगी रहेको एसपी चन्दले बताए।

यसैगरी, लमही नगरपालिका–७ निवासी २५ वर्षीय प्रकाश चौधरी, सोही ठाउँ निवासी २५ वर्षीय पाल्टुराम चौधरी, सोही ठाउँका २७ वर्षीय हेमन्त गिरी, सोही ठाउँकै २४ वर्षीय धनिराम चौधरी, राजपुर गाउँपालिका–२ बेला निवासी १९ वर्षीय आयोज चौधरी, सोही ठाउँका २२ वर्षीय प्रियतम चौधरी, सोही ठाउँका २७ वर्षीय रविप्रताव यादव र सोही ठाउँका २७ वर्षीय राजकुमार यादवलाई पक्राउ गरिएको उनले जानकारी दिए। उनीहरुमाथि थप अनुसन्धान भइरहेको प्रहरीले जनाएको छ।