मनसुन सक्रिय हुनेक्रम जारी

काठमाडौं, असार २८ : जल तथा मौसम विज्ञान विभागले आइतबार देशभर सामान्यदेखि पूर्ण बदली रही अधिकांश स्थानमा वर्षाको सम्भावना रहेको जनाएको छ। 

गत बिहीबारदेखि सक्रिय रहेको मनसुन अझै केही दिनसम्म कायम रहने भएको छ। मनसुन न्यूनचापीय प्रणाली तराई भूभाग नजीकै रहेकाले थप सक्रिय भएको मौसमविद् राजु प्रधानाङ्गले बताए। “सोमबार बेलुकाबाट उक्त प्रणाली बिस्तारै दक्षिणतिर सर्ने क्रममा रहेको छ”,उनले भने।

न्यूनचापीय प्रणाली नेपालबाट हटे पनि मनसुनकै समय भएकाले वर्षा भने भइरहने उनले जानकारी दिए। यस वर्ष मनसुनको समयमा औसत वर्षा हुने अनुमान गरिएको छ। हाल देशभर सामान्य बदली रही प्रदेश १, २ तथा वागमती प्रदेशका धेरै स्थान र बाँकी प्रदेशका केही स्थानमा वर्षा भइरहेको छ। यसका साथै प्रदेश १ र २ का एक–दुई स्थानमा भारी वर्षासमेत भइरहेको छ। दिउँसो देशभर सामान्यदेखि पूर्ण बदली रही धेरैजसो स्थानहरुमा हल्कादेखि मध्यम वर्षाको सम्भावना रहेको बताइएको छ। 

त्यस्तै प्रदेश १, प्रदेश २ र वागमती प्रदेशका थोरै स्थानहरुमा र गण्डकी प्रदेश, प्रदेश ५ तथा सुदूरपश्चिम प्रदेशको एक–दुई स्थानमा भारी वर्षाको सम्भावना रहेको मौसम पूर्वानुमान महाशाखाले जनाएको छ। महाशाखाको पछिल्लो विवरणअनुसार आज काठमाडौं उपत्यकामा ३ दशमलव २ मिलिमिटर वर्षा भएको छ। त्यस्तै पोखरामा १९ दशमलव ५, नेपालगञ्जमा ४ दशमलव ६, धनकुटामा ४४ दशमलव २, विरेन्द्रनगरमा ६० दशमलव ७, दिपायलमा ११ दशमलव २ र धनगढीमा २७ दशमलव २ मिलिमिटर वर्षा भएको छ।