नागढुङ्गा–सिस्नेखोला सुरुङमार्गको हतारमा उद्घाटन, सर्वसाधारणले अझै कुर्नुपर्ने

काठमाडौं, साउन २५ : औपचारिक रूपमा उद्घाटन भइसकेको नागढुङ्गा–सिस्नेखोला सुरुङमार्ग अझै सर्वसाधारणका लागि सञ्चालनमा आएको छैन। 

सडक विभागले भने सुरुङमार्ग साउन महिनाभित्रै सर्वसाधारण तथा सार्वजनिक यातायातका लागि खुला गर्ने जनाएको छ । हाल सुरुङमार्ग आकस्मिक तथा आपत्कालीन सवारीसाधनका लागि मात्र सञ्चालनमा रहेको विभागले जनाएको छ।

सडक विभागका प्रवक्ता तथा उपमहानिर्देशक ई।शुभराज न्यौपानेका अनुसार सुरुङमार्ग सर्वसाधारण तथा सार्वजनिक यातायातका लागि खुला गर्नुअघि अन्तिम सुरक्षा परीक्षण भइरहेको छ।

‘अहिले सुरुङमार्ग आकस्मिक सवारीसाधनका लागि मात्र सञ्चालनमा छ। अब सबैका लागि खुला गर्नुअघि अन्तिम सुरक्षा परीक्षण हुँदैछ,’ न्यौपानेले भने।

उनका अनुसार सुरुङभित्र कुनै आपतकालीन अवस्था सिर्जना भएमा यात्रुको उद्धार कसरी गर्ने भन्ने विषयमा सुरक्षा परीक्षण गरिनेछ। विशेषगरी बसमा ठूलो संख्यामा यात्रु सवार रहेका बेला आगलागी भएमा उनीहरूको उद्धार कसरी गर्ने भन्ने अभ्यास परीक्षणको मुख्य विषय रहेको उनले बताए।

सुरुङमार्गमा अहिले ब्यारिकेड तथा ड्रम राखिएका तस्बिरहरू सार्वजनिक भइरहेका छन् । ती सामग्री सुरक्षा परीक्षण तथा तयारीका क्रममा राखिएको प्रवक्ता न्यौपानेको भनाइ छ।

‘अहिले ब्यारिकेड ड्रमहरु लगाएको छ, त्यही भएर फोटोहरु पनि सामाजिक संजालमा आइरहेका छन् । यसमा के बुझिदिनुपर्यो भने इमर्जेन्सी भेहिकलहरुको लागि मात्र मुभमेन्ट छाडेका छौँ । अन्तिम क्लोजिङका लागि एउटा सेफ्टी टेस्ट हुन्छ । भित्र आगो लागिहाल्यो भने कसरी उद्धार गर्ने भन्ने विषयमा परीक्षण गरिरहेका छौं । उदाहरणका लागि ५० जना मान्छे चढेको बसमा आगो लाग्यो भने कसरी रेस्क्यु गर्ने भन्ने विषयमा अध्ययन गरिरहेका छौं । एयरपोर्टमा कहिलेकाहीँ देखाउँछ नि इमर्जेन्सी टेस्टहरु त्यस्तै सुरुङ मार्गमा पनि गर्नुपर्नेछ । त्यो एउटा टेस्ट बाँकी रहेकाले सबैलाई खुला नगरिएको हो । त्यो टेस्ट हुने बित्तिकै सबैको लागि ओपन हुन्छ । त्यहाँ हाल राखिएका सामग्री सुरक्षा परीक्षण तथा तयारीका लागि राखिएको हो,’ उनले भने।

अन्तिम सुरक्षा परीक्षण सम्पन्न भएपछि सुरुङमार्ग सबैका लागि खुला गरिने र त्यसका लागि साउन महिनाभित्रैको समयसीमा राखिएको प्रवक्ता न्यौपानेले बताए।

उक्त नागढुङ्गा–सिस्नेखोला सुरुङमार्ग साउनको दोस्रो साता औपचारिक रूपमा गरिएको थियो । पूर्वाधार विकास मन्त्री सुनिल लम्साल, नेपालका लागि जापानका राजदूत मायदा तोरु तथा जापान अन्तर्राष्ट्रिय सहयोग नियोग ९जाइका० का अध्यक्ष डा।तानाका अकिहिकोको उपस्थितिमा आयोजित विशेष समारोहबिच सुरुङमार्गको औपचारिक उद्घाटन भएको हो।

सात वर्षपछि उद्घाटन भएको सुरुङ मार्ग सञ्चालनमा आएसँगै काठमाडौँ उपत्यकाको प्रवेशद्वारमा हुने सवारी चाप व्यवस्थापन, यात्रा समयको बचत तथा सुरक्षित र आधुनिक सडक पूर्वाधार विकासमा महत्त्वपूर्ण योगदान पुग्ने विश्वास लिइएको छ।