छोरीको नाममा विद्यालयमा अक्षयकोष स्थापना

सङ्खुवासभा, फागुन १० : सङ्खुवासभाको चैनपुर नगरपालिका–२ स्थित श्री आधारभूत विद्यालय पिङडाँडामा पूर्वविद्यार्थी टिका सिम्खडाले आफ्नी छोरी आर्जुको नाममा १ लाख ११ हजार १ सय ११ रुपैयाँको अक्षयकोष स्थापना गरेका छन्।

विद्यालयको ६२औँ वार्षिकोत्सवको अवसर पारेर सिम्खडाले उक्त अक्षयकोष स्थापना गरेका हुन्।

२०५२ सालमा कक्षा ५ सम्म अध्ययन गरी विद्यालयबाट निस्किएका सिम्खडाले शनिवार आयोजित वार्षिकोत्सव कार्यक्रममा सो रकम प्रदान गरेका हुन्। २०२१ सालमा स्थापना भएको उक्त विद्यालयमा हाल कक्षा ५ सम्म अध्ययन सञ्चालन भइरहेको छ।

वार्षिकोत्सवका अवसरमा आयोजित कार्यक्रममा चैनपुर नगरपालिकाकी उपप्रमुख एलिना श्रेष्ठ, अक्षयकोषदाता पर्वत श्रेष्ठ, बालविकास माविका सुरेन्द्र तामाङ, विद्यालय व्यवस्थापन समितिका अध्यक्ष भास्कर सिम्खडा तथा विद्यालयका प्रधानाध्यापक विनायक सिम्खडालगायतले मन्तव्य व्यक्त गरेका थिए।